Ioh kem kali kit jhur na Assam na LadMawrong

Shillong:Ka Dorbar Shnong Umsaitsning Lad Mawrong ha ka por 6 baje mynstep kala ioh ban kem ia kawei ka Kali kit jhur ba wan na jylla Assam kaba don ia u number AS13 AC1371 khlem da biang ki kot ki sla ba lah ban wan sha jylla Meghalaya.

Ha kane jingiohkem haba tohkit na u nongniah kane ka kali la shem ba ym shem ladon ka curfew pass ne ka interstate permit bad u la shu wan tang da kaba ai kyrteng ha ki khyrdop pahara (check gate).

Ha ka jingiakren bad u Rangbah Shnong ka Lad Mawrong u bah Frankie Nongrum u la iathuh ba kane ka jingioh rung jong kane ka kali na Assam khlem ki kot ki sla ba biang ka lah ban wanrah ka jingma ka khraw da kaba ong ruh ba lada ki nongpahara kim peit bniah bad ki briew kiba nabar ki lah ban rung katba mon tang da ka jingleh buit tuh, kumta ka buh jingma kaba khraw ia ka imlang sahlang.
Na ka liang ka Dorbar Shnong Umsaitsning, LadMawrong ka la aiti noh ia u nongniah kane ka kali sha ki pulit ka Umsning Police station ban leh ia kaba donkam.