Na ka kordit Corona, ngi sdang ia phai khmat sha U Blei

Bah RM Shabong

Ka pynlung mynsiem (lehse) ia ki Khristan, haba ki iohi, ba u myntri rangbah duh, u ai khublei ha ka jingrakhe ia ka Easter Sunday bad ka pyndap jingkmen ruh, haba u myntri rangbah, ula pynbna ban pynlong ia ka jing ia duwai lang, na bynta ka jingmih pat U Jisu Khrist, u khun jong U Blei.

Hangne, ka mat, ka long ba ngim dei namarkata ban niew poh lane ban kren bein ia ka niam jong kiwei, haba ngi im ha ka ri synshar paidbah, namar ba jan baroh ki jait niam, ki hikai tang ia kaba bha lane kumba ngi ong ha ka ktien khasi ban im tip briew tip blei lane ban kamai ia ka hok.
Ym dei tang U Narendra Modi, ym dei tang U Conrad Sangma, hynrei kiwei de ki nong ialam ba khraw jong ka pyrthei, ki wad Blei ha kine ki sngi bad ka daw, ka long namar ba kane ka jingpang Coronavirus, ka la sympat jur ia u paidlang ka pyrthei, ha kaba ka jingstad jong ka saian, kam pat bna satia, kumno ban ialeh pyrshah bad haba ka long kumta, ka pyni ba ka jingstad jong u briew, kam pat iahap dor eiei satia, wat shi saphit ruh, ha ka bor ba maian jong U Blei.

Shisien pyrkhat, ngim lah ban mutdur, ba ka jing sumar pang, kam dei satia ban leit sha hospital, kam dei satia ban leit sha ki doktor, kam dei satia ban leit sha Vellore, sha Apollo, sha America bad ter ter, hynrei ba ka dei ban pyn jari da ka pakhang shnong bad ban shong khop ha la ki jong ki iing bad katei lehse, sngew kumba ka dei ka ain jong ka juk maw hyndai, ha ka por ba ka saian ka dang sahdien.
Kumba la ong haneng, hangne kein ka pyni shai ba ka jingstad jong u briew, kam iahap dor eiei bad ka jingstad jong U Blei bad hangne, ka la dei ruh ka por ia ka pyrthei, ba kan kyndit bynriew noh bad kata ka long ba ka jing synshar paidbah lane ka synshar khadar, kam mut tang ia kiba thaw ain, kiba nang ban pnah thylliej, kiba ngeit ia ka niam kaba kham bun briew, nangta kiba hukum ia kiwei pat, lyngba ka jingthoh ha ka kotsada lane ka video call; hynrei ha kane ka khlam kaba mynta, ngi iohi shai ba ki don shibun ki riew paidbah lane ki riew madan kiba la len ia la ka jingim; kiba ngi hap ban niew kor pleng ha ka jingtrei kam jong ka sorkar bad kiba ngi la leh klet baroh shi katta.
U Blei uba stad bad u la pyn khynniuh ia ka pyrthei bad kumta, ngi khmih lynti ba kane ka khlam, kan pyn pei shkor ia u paidlang ka pyrthei salonsar.