Ka Sngi Thohdieng babha

Rev. B.P. Pohsngap

Ka “Good Friday” kaba la long doh long snam ha ki pait Khristan ka pyrthei baroh kat kiba la ngeit ia U Jisu U Khunlung jong U Blei U ba la wan long doh ha ka pyrthei. Kane ka snem 2020, ka long ka snem ban sah kynmaw namar ngim ioh lad ban leit sha ki ing mane, kat kum ka jingjia kaba ngi ia kynduh mynta. Ka jingduh kaba khraw ia kiba ngeit, hynrei wat la ngin pynlong jingiaseng ha ki ing ki ing ruh, ka biang hi Katkum ka por kaba U Blei hi U la pyniaid. Kane ka sngi ka long ban ai ka jingphla, ba ngi leh burom ia U Jisu U Khun marwei jong U Blei, “ U ba la wan ha ka doh”. Ka shithi kaba Nyngkong U Ioannis 4:2, ka ong , “ Ka mynsiem baroh kaba phla ia U Jisu Khrist ba U la wan ha ka doh, ka long na U Blei”, phi la ngeit ba U Jisu U la wan ha ka doh?. Lada phi la ngeit phi long na U Blei.

Kum kane ka por kaba ngi im, ngi la dei ban leh burom bha ia kane ka sngi 10th April 2020, wat la ha ing ba ia don tang khyndiat ruh, namar U Jisu U la dep kular ba lada phi don ar ngut ne lai ngut “ hangta ngan don ryngkat bad phi”. Kane ka sngi kan long kawei na ki sngi, ba ngin pynpaw ba ngi don bad U Blei bad U Blei U don bad ngi Amen!!. U Apostol Ioannis 1 Ioan 4:15, u ong, “ Jar U ba da phla ba U Jisu U long U khun U Blei, U Blei UN IAISAH HA U, BAD MA U RUH HA U BLEI”.

Ngi don ka hok kaba dei eh ban leh burom, kynmaw burom, namar ka jingwan long doh jong U sha ka pyrthei, ym tang ban im kum ki briew baroh ha ka pyrthei, hynrei U wan khnang, “ BAN PYNIM IA KA PYRTTHEI” Ioan 4:14; “ BA U KPA U LA PHAH IA U KHUN BAN LONG U NONGPYNIM JONG KA PYRTHEI”. Ha kane ka por mynta to ngin peit katto katne ia ka jingthmu na myndang long ka pyrthei hi, ka jingthmu lypa ia ka jingpynim (Fore ordain Plan of Salvation).

1. Ka jingthmu ba la buh hi U Blei:- ka kitab Jenesis 3:15 ka ong, “ Bad ia ka jingshun ruh ngan buh hapdeng jong Me bad kata ka briew, bad hapdeng U symbai jong Me bad u symbai jong ka; u symbai jong ka un pynlwet ia ka khlieh jong Me bad Me men pynlwet ia ka khongdongkjat jong U”. Nga kynmaw ki riew tymmen ki ju ong, lada phi lap ia u bsein to pynlwet ia ka khlieh jong u bad sumar bha ioh u puh na khongdong kjat, namar tang shu puh na khongdong kjat lah iap. Kane ka dei tang ka jingmaian ym ia u bsein uba ngi iohi bad pyniap, u bsein te lada khlem lwet ka khlieh ruh lada ka met ka la lwet te un im shuh shano. Katei ka dkhot ka thew ia u soitan bad U Khun U Blei- U Jisu U ba wan long briew ha ka pyrthei. Ngi la iohi ia ka jingiashun u soitan bad U Khun u briew (Jisu) kaba khraw haduh katta katta. U soitan u shun ruh ia ki bynriew baroh, lada u ioh lad ban puh beit ia ki khongdongkjat ka jingim U Briew. Ha ka jingialapU Petros ha ka sngi Pentekost, U dang ai jingphla shaphang kumno ba la buh hi da U Blei. Ha ka kam ki Apostol 2:23 “Ia Une ba la aiti noh da ka jingthmu ba la buh bad da ka jingtip lypa U Blei”.
2. La thmu lypa mynshuwa ki rta, khnang ia ka burom jong ngi (which God Ordained before the world unto our Glory) :- kane ka jingkren kaba maian haduh katta katta, kiba stad jong ka pyrthei, bad kiba khraw batri ka pyrthei kin nym sheptieng ia kane, hynrei tang “ kiba stad hapdeng kiba janai”, kiei kita “ kiba stad hapdeng kiba janai”? 1 Kor 2:6. Kane ka thew ia kiba la san bha ka jinglong mynsiem (spiritual maturity). U Apostol U la ju phla, “ ba mynba U dang long khynnah U long kum u khynnah, hynrei ynda u la rangbah u la iehnoh ia kiei kiei ruh ki jong u khynnah”. 1Kor 13:11. U kyntu ruh ia kiba ngeit . 1Kor 14:20. “Ko parabangeit, to wat long khynnah ha ka jingshemphang; hynrei ha ka jingbymman to long Khunlung, te ha ka jingshemphang to long rangbah”. Kane ka long ka kamram, kita kiba la iaid shisha ha ka nongrim U Khun U Blei Uba la iap halor diengphna, ki don ia ka thong, “ Tad ynda ngi ioh poi baroh, sha kata ka jinglong kawei ka jong ka jingngeit, bad ka jong ka jingtip ia U Khun U Blei, haduh ka jinglong rangbah bha, haduh ka jingthew ka rynnieng ka jingdap U Khrist” Ephes 4:13.

Kane ka sngi Thohdieng babha (Good Friday) ka dei ka bynta “ Ka burom jong ngi”, ki nongpop ba la siewspah da ka jingaiei U Blei Lyngba ka snam ba la pynmih halor ka diengphna, bad da ka jingiap jong U, ngi iohi ia kata ka burom kaba da kat ka burom. Ka burom kaba khraw eh ha ngi, ka long ba da kaba iap halor ka diengphna, “ la pynjot noh ia ka met ka jong ka pop, khnang ba ngin nym long mraw shuh ha kata ka pop”.

“ Namar U ta U ba la iap kumta la pyllait ksan ia U na ka pop.” Ka burom kiba ngeit ban ioh rung sha ka hok ka jinglong riewblei riewkhuid, bad ban ioh pdiang ia ka jingim bymjukut. “ Uta U ba ngeit ha U khun, U don ka jingim bymjukut; uta te u bym Kohnguh ia U khun , un nym iohi ia ka jingim; hynrei ka jingbitar jong U Blei ka iaisah halor jong U”. Ioan3:36.
Sngi Thohdieng basuk bakmen ia kito baroh kiba ngeit ha U Khun U Blei U Nongpynim jong ka pyrthei… AMEN……..