Ka Hynniewtrep Youth Council War Jaiñtia Circle hapoh ka jingialam u President Samla Yoodahunki Shylla bad u Sport Secretary Samla Bonanza Shylla, ka pynrem jur ia ki nongmihkhmat ka thaiñ halor ka jingleh kyllut jongki, nalor ba ki ioh sngew bad leh matlah nalor ba ki iohi hadien ka jingiai ud iai lynniar ki paidbah kiba duk ba kyrduh kiba im kyndoi jakpoh haka jingbylla nongsngi.
Ha kine ki sngi da ki hajar tylli ki longiing kiba mat iaka apot lanot naka jingbym ioh lad shuh ban bylla na ka jingburom iaka curfew ka sorkar pdeng bad sorkar jylla ban iada naka khlam jingpang Covid-19.
Na ka curfew, kitei ki riew shem lanot ka thaiñ kila pynpaw iaka jingeh jongki sha ka seng halor ka jingkyrduh bam kyrduh dih jongki namar kim don pisa shuh ban thied khaw. Halor kane ka bynta ka seng ka dap daka jingsngewkhia jur halor ka jingkheiñ sting ki nongmihkhmat ka thaiñ namar haka por elekshon ki heh tang ka kular ban kit ban bah iaka khia ka shon u kup shiliang sem shiliang hynrei katei ka jingkular jongki ka long pynban tang kum ka jingpynbiej paidpah namar hakum kane ka por ba wan ka nem sniew ym don u wei ruh u nongmihkhmat ba dap shynrang ban phaikhmat shaki paidpah.
Ki nongmihkhmat ka thaiñ ki nang tang ban thok ban shukor ia ki paidpah hynrei ki klet pat iakaei ba ki la dep kular mynshwa bad lada ym dei da kumta balei shaki wei ki thaiñ ka jylla ki nongmihkhmat wat ki bym don ha ka liang shynshar ruh ki lah ban iarap iaki paidbah jongki katba ki nongmihkhmat ka War Jaiñtia pat balei kim lah?
Haka juh ka por ka seng ka dap daka jingkthang mynsiem ban peit iaki paradoh para snam kiba ud ba lynniar kum hakane ka por hynrei kum ka seng kam nym lah ban shu long tang kum ki nongpeitkai hynrei kala ialeh shitom katba lah laka buit ka bor ban wad lad wad lynti khnang ba yn lah ban iarap iaki paidpah ha kum kane ka por ba wan ka nemsniew.
Kumta la kyntu ia kito kiba riewspah, ba kin sngewbha ban noh synniang lem shakito kiba mad iaka jingshem lanot naka jingduk jingkyrduh.
Phi don ban ong eiei?