Ka sorkar India, la sngewthuh ba ka dang pyrkhat ban dang pynjlan ia ka jing pakhang shnong ha kylleng ka Ri, lyngba ka jingai jingmut jong ki sorkar Jylla bapher.
Ka jingdon kiba pang Covid 19, haduh mynta ka long 4,221 bad kiba iap, ki long 117 ngut bad la iathuh ba ki don 354 ngut kiba ioh ia katei ka jingpang, ha ki 24 kynta ba ladep.
Ka jingiap ha Spain mynta ka sngi, ka long 743 ngut bad baroh kiba iap, ki la poi sha ka 13,798 ngut bad katei ka jingiap, ka nang kiew na ka jingiap kaba 637ngut kaba la jia shisngi shwa kata.
Ka jinglum jingtip jong ka John Hopkins University, ka iathuh ba baroh kiba pang ha ka pyrthei, ki don mynta 1,350,841 lane 1.3 million bad kiba iap, ki la poi sha ka 74,870.
U Shinzo Abe, myntri rangbahduh ka Japan, ula pynbna da ka jing synshar shipai ha katei ka Ri bad katei ka long, ban iakhun pyrshah ia kane ka jingpang Covid 19. Ka sorkar Japan, kan bei pisa ruh, na ka bynta ban pynlut ha kaba iakhun pyrshah ia katei ka jingpang, da 108 trillion yen ($990 billion) kaba long 20 percent na ka jingdon spah jong ka Japan.
Phi don ban ong eiei?