Shillong: U symbud myntri rangbah ka jylla u bah Prestone Tynsong mynta ka sngi u la ong ba ka sorkar Meghalaya ka la shim ia ka rai ban bteng ka jingkhang ban ia rung ia mih ki briew ha ki khappud wat lada ka pakhang shnong lane ka ‘lock down’ ha baroh ka ri India kan kut noh ha ka 15 tarik iaiong 2020.
“Ka jylla jong ngi haduh mynta ka long ba donbok shisha ba ka jing pang ‘corona virus’ kam pat poi namar kata ka sorkar ka la rai ban bteng biang ia ka jing ia rung briew shapoh ka jylla kum shi bynta ban khanglad ia ka jing pur ka jing pang” u la bynrap.
Na ka liang u bah Prestone Tynsong u la ong ba ka sorkar Meghalaya kala bthah ia baroh ki Deputy Commissioner (DC) bad ki Superintendent of Police (SP) ban phikir bha ia ki khyrdop ha baroh ki khappud ka jylla bad dei ban shah tang ia kali kit marbam kiba la ithuh da ka sorkar.
Naduh 15 tarik iaiong yn shah pyntrei ia kato katne ki kam hapoh ka jylla. U symbud myntri rangbah ka jylla u bah Prestone Tynsong mynta ka sngi u la ong ba ka sorkar Meghalaya ka la shim ia ka rai ban pynkylluid ia katto katne ki bynta hapoh ka jylla na ka pakhang shnong.
Na ka liang u bah Prestone Tynsong u la ong ba ka sorkar kan pyllait noh ia ka mang pisa ba 534.6573 klur tyngka na ka bynta ban pyntrei kam hapoh ka ki shnong lygba ka skhim MGNREGA.
“Ia ka pisa na ka bynta ka skhim MGNREGA yn pyllait sha ki ‘Block Development Officer’ na ka bynta ban siew bai bylla sngi bad ban thied ia ki tiar ba donkam” u la bynrap.
U bah Prestone Tynsong u la ong ruh ba ka sorkar ka la rai ba naduh ka 15 tarik iaiong, ki jingtei bapher bapher kynthup naduh ka surok bad kiwei kiwei ki kam pynroi kiba sahteng naduh u snem ba la dep ki lah ban bteng biang ban trei.
Ka sorkar ka la shim ia ka rai ban sdang treikam biang ia ki ophis sorkar ba ka la kyntu ia baroh ki nongtrei sorkar ban poi sha ki jaka trei naduh ka 15 tarik iaiong 2020.
Wat lada ka sorkar Meghalaya ka dang bteng ia ka jing khang ia ki khyrdop ha ki khappud ka jylla, hynrei mynta ka sngi ka la shim ia ka rai ban shah iaid ia ki kali shimet tang hapoh ka jylla.
U symbud myntri rangbah u la ong ruh ba ka sorkar ka la shim ia ka rai ban shah noh ia ka jing plie ia ki iew ba shi sien shi taiew ha ki jaka ba kham kyndong hapoh ka jylla tangba ki paidbah ki dei ban bud ia ki kyndon ba la btah ka tnat ka koit ka khiah ka sorkar.
Haba dei bad ki nongrep u bah Prestone Tynsong u la ong ba ka sorkar ka rai ban ai lad kyrpang ia ki nongrep ba kin sdang noh ban thung ban tep lane ban bet ia u symbai ha ki lyngkha bad ki bri jong ki.
Kyntu u bah Prestone Tynsong ia ki samla ka jylla ban long ki ba iai shah shipor. U symbud myntri rangbah ka jylla u bah Prestone Tynsong mynta ka sngi u la kyntu ia ki samla ka jylla ban long kiba iai shah bad kim dei ban kyrkieh ban wan phai sha poh ka jylla na ka bynta ka jing bha jong ki bad ka jylla hi baroh kawei.
Haba kren bad ki lad pathai khubor mynta ka sngi u bah Prestone Tynsong u la ong ba ki don haduh 2192 ngut ki samla pule kynthup ia kiba la trei ha kylleng ki jylla jong ka ri India bad u la kyntu jur ia ki ba kin iai shah shipor ban sah shwa ha kito ki jaka ba ki don mynta katba ka jinglong jingman halor u Corona Virus kam pat shngain.
“Kum shi bynta ban iada ialde bad ia ka jylla Meghalaya baroh kawei nga kyntu ia ki samla ka jylla ba kin sah shwa ha kito ki jaka ba ki don mynta bad hadien ka 30 tarik iaiong 2020 ka sorkar Meghalaya kan sa pyrkhat lad lynti ban wan ialam noh shapoh ka jylla” u la bynrap.
Phi don ban ong eiei?