Ka shnong Mawkhlam”

La thaw da u Ex.Rev.K.Langrin

1.Ha sngap ba ngan iathuhkhana,
Shaphang ka shnong Mawkhlam,
Kumba shispah snem mynshuwa,
Jingjia ba pynsah nam.

2.Ka shnong Mawkhlam ha West Khasi,
Ïa ngi ka pynpyrkhat,
Khamtam ha kum kine ki sngi,
Ïa khlam ngi kyiuh that that.

3.Hyndai ha por jong ka khlambah,
Ki briew ki phet sha khlaw,
Ki ïing ha shnong la ieh ïingjah,
Man la ki shnong ki thaw.

4.Kyrteng nyngkong ka Mawtynrong,
Hadien pat ka Mawkhlam,
Kaei ka daw to ngin ia ong,
Dei ki maw ba donnam.

5.Nongkñia nongkhan ki ialeh thma,
Pyrshah ia khlam bam briew,
Kiei ki lad ba kin iada,
Ban lait na khlam basniew?

6.Khatduh la ieng da ki basa,
La plie ki buit ki lad,
Ï’u khun bynriew ha jingpisa,
Ïa khlam ba kin beh krad.

7.Ryngkew basa ki la hikai,
Kumno ki briew kin leh?
Ban thung ki maw bad ka jingsmai,
Bad ia ka khlam ban beh.

8.Shi khlieh shynrang ki leit thungmaw,
Ban beh noh ia ka khlam,
Naduh kata ban sah kynmaw,
Sa khot ka shnong Mawkhlam.

9.Ynda la beh noh ia ka khlam,
Ki briew la wanphai biang,
Ïa ka la khot ka shnong ‘Mawkhlam’,
Ban sah kynmaw kyndiang.

10.Naduh kata ka khlam ka ngoh,
Ka phet sha riat sha ram,
Ïa shnong kam nud shuh ban wan jngoh,
Sa neh ka shnong Mawkhlam.

11.Nangne nga don ban ai jingmut,
Kum ka jingpynkynmaw,
Ynda kane ka khlam la kut
To ngin thung ki mawnam.

12.Lada don bok ngin lait ka khlam,
Baroh ka ri Khasi,
To ngin thung noh da ki mawnam,
Kylleng ka ri jong ngi.

13.Kane ka dei ka ri jong ngi,
Ka ri baieit ki blei,
Ka khlam kan kiar ia ri Khasi,
Ba tieng ia khmat U Blei.

14.U Blei na jrong na tbian u peit,
Ïa kiba ieit ia U,
Ngin ym sheptieng ngin ym khaweit,
U Kynrad un kyrkhu.

15.Amen Amen, ko para ri,
To ngin iasnoh kti lang,
To ngin duwai man la ka sngi,
Baroh kynthei shynrang.
–‐———————————————————
Nga la thaw ia kane ka poitri mynta ka janmiet, dt.06.04.2020 ba ki nongpule kin pyrkhat jylliew. (K.Langrin)