Pyrkhing ki nongialam shnong, Seng Samla bad paidbah ha Ri Bhoi Sepngi

Nongpoh: Ka khubor kaba la mih halor ka jingdon ki briew ha Assam kiba la ngat ia u COVID-19, ka la pynsyier shikatdei eh ia ki paidbah hapoh ka jylla hi baroh kawei bad khamtam eh ia kito ki shnong kiba don ha khappud ka Meghalaya bad Assam, kawei na ki sakhi kaba shai eh ka dei halor ka jingpyrkhing jong ki briew ka thain Pathar khmah, Warmawsaw, Umsohbar lem bad kiwei, ha kaba ki la pyrkhing shisha ia ka leit ka wan jong ki briew kiba nabar bad ki shah ban rung sha katei ka thain, khlem ki daw kiba biang ha ryngkat ka jingioh jingbit na ki bor Sorkar.

Haba leit ban jurip ia katei ka thain, la lap ba tang shu poi ha Patharkhmah, la don ja kaba la ap kyrpang na ka bynta ban peit ia ki briew nabar bad kumta ter ter shaduh Warmawsaw, Umsohbar lem bad kiwei de ki shnong kiba don ha katei ka thain, katei ka jingpyrkhing ia ka leit ka wan kam thew tang ia ki briew kiba nabar jylla, hynrei wat ia ki briew kiba dei na katei hi ka thain, kim shah ba kin shu leit shang lane ban mih na ki iing ki sem khlem ki daw kiba biang.
La lap ruh ba ha shilynter jong katei ka thain, ki surok ki kynjah jak bad ym shem la iohi briew kiba iaid ban ieng ha surok lane ha ki shnong ki thaw, namar ki briew ki hap ban shong beit ha ki iing ki sem.
Haba ioh ban iakren bad ki katto katne ngut ki nongialam shnong, kiba kynthup ia u Bah Manason Doloi, Sordar ka Warmawsaw, u Bah Slendar Lyngdoh Sordar ka Umsohbar lem bad u Samla Thangkhiew, President ka Seng Samla Shnong Patharkhmah, ki la ong ba ka nongrim kaba la pynlong ia ki ba kin hap ban shimkhia ha kaba pyrkhing ia ka rung ka mih jong ki briew kiba nabar, ka dei namar ba ki tieng ioh ki briew na kiwei ki jaka, ki ioh ban rung sha ki shnong kiba don ha katei ka thain.
Ki la ong ruh ba katei ka thain, ka dei kaba iajan eh bad ka Assam, namarkata lada kum ki briew ha shnong kim shimkhia ha kaba pyrkhing ia ka rung ka mih ki briew nabar, kan sa wanrah jingma pat ia ki briew ha ka thain hi baroh kawei.
Na ka sur kaba la mih na kitei ki briew kiba la ioh ban iakren, ki la kyntu lem ia kiwei pat ki shnong kiba don ha katei ka thain bad khamtam eh ia kito kiba don ha khappud bad ki dei ban long kiba peitngor bad pyrkhing ia ka rung ka mih jong ki briew ki bym dei ki trai shnong.