Na ka jingtieng Corona, ker khyrdop sa ha ki shnong

Bah RM Shabong

Ka jingpang corona, ka la pyn kulmar jingmut lut ia u paidbah paidlang ka Ri Khasi Jaintia bad katei ka long naduh ka beh bam, haduh ka tieng jingpang, haduh ka ia tieng para briew bad la iohi, ha kine ki sngi, ba ka la ngam jylliew sa ka jingsngew tieng jingpang bad kumba kam don satia ka jingthmu ban ialeh pyrshah.

Kaba kham i pher ha kane ka kynti ba mynta, ka long ba kata ka jingtieng jingpang corona, ka la pynlong ba kin don sa ki kyndon ban ia khang rung shnong rung thaw bad kata ka long ba kin khang ia ki marjan marpa, ba kin ia wan sha ki paralok parajor, lane sha ki iing ki sem jongki bad la iohi ruh, ba ki don kiba khang da ki khyrdop bad ki pynieng da ki kynroh, na ka bynta ban khanglad ia ki briew kiba nabar ba kin nym ioh rung satia.

Ka sorkar India, lane ka sorkar Jylla, kam shym buh satia ia kitei ki kyndon, ban khang ia ka rung ka mih ha ki shnong ki thaw, hynrei ka khang ban ia shong lymbung ha kano kano ka jaka, lane kata kaba ki ong social distance bad nangta ka khang ia ka jingrung jong ki briew kiba sah shabar Jylla bad kumta ka khang ia ka khyrdop ha ki khappud, ba kiba nabar, kin nym ioh rung satia; hynrei ka kyndon ban khang ban ia rung ia mih na Mawkhar, sha Mission Compound lane sha Qualapatty kam don satia.
Halor kane ka jing khang khyrdop ha ki shnong ki thaw, ka la dei namarkata ia ka sorkar Jylla, lane ki bor District ba kin tuklar noh mardor, namar ba kane ka ain khlem pep, kan ialam sha ka jingma kaba khraw ha ki sngi ki ban sa wan, namar ba kan don ka jingshim kabu lane ka jing ia tyngkhuh ha ka leit ka wan bad ka ban poi pynban sha ka jing ia kynnoh nongshong noh lane ka jing ia pyni bor para briew.
Ngi dei ban sngewnguh ia U Blei Trai kynrad, namar ba haduh mynta ka Ri Khasi Jaintia, kam pat don ia kiba ioh ia katei ka jingpang bad haduh mynta, ngi dang long kiba khuid kiba suba kumta ka jing ia khleh jongngi para shnong, paralok, para iing, para kur, kam don jingma eiei ruh em, wat la ha kajuh ka por, ngi dei pat ban long kiba adkar, da kaba bud ia ki katto katne ki jingbthah jong ka sorkar.
Ngi dei ruh ban kynmaw, ba ki khasi jongngi, ki dei kiba ia beh bha ha ka kam iing kam sem, ka iap ka im bad lada ka don ka jingker khyrdop, kumta kan poi ha kaba kiba leit iap briew ruh, ki dei ban ioh jingbit naki bor shnong.