Sam marbam ka dorbar shnong Quallapaty

Shillong: Myn hynnin ka sngi ka dorbar shnong Quallapaty kala ai jing iarap ia kumba 100 ngut ki briew ba ngut na ka shnong kum shi bynta ban pynbiang ia ki long ing jong ki kum ha kane ka por ba pakhang shnong lane ka ‘lock down’ ha baroh ka ri India.

Ha kane ka jing sam marbam, da ka dorbar shnong Quallapaty la ia shim bynta da u rangbah shnong u Martamlin Pyrbot, u bah Joe Bareh secretary shnong u Pradip Agarwal lem bad ki dkhot ka dorbar shnong.
Haba kren ha ka jing sam marbam, u bah Martamlin Pyrbot u la ong ba ia kine ki marbam la ai sngewbha da u Guatam Agarwal u ba la ai 10 byrni u khaw, Dai 100 kilo, Phan 200 kilo, umphniang bam 240 bilor kaba 200 ml, katba na ka liang ka Shillong Marwari Community kala ai 3 byrni u khaw ba 50 kilo, 30 bilor ka umphniang bad 30 kilo u dai.
U bah Martamlin Pyrbot u la ong ruh namar ka jing pakhang shnong lane ka ‘lock down’ habaroh ka ri India kum shi bynta ban tehlakam ia ka jing saphriang ka jing pang corona virus bun ki paidbah ka thain kila shem jing jynjar ban pynbiang bam hala ing namar ba kim ioh bylla sngi, namar kata ka dorbar shnong ryngkat ka jing nong synniang da kato kato ngut ki briew ka la ioh ban sam marbam sha kato katne ki briew ba duk hapoh ka shnong.
Na ka liang u bah Joe Bareh u la ong ba ha kum kane ka por ym dei ban ia peit briew hynrei kum ki briew dei ban iarap iwei ia iwei pat khlem da niew tang bad kaba kongsan ka long ban kynmaw ban duwai ha u Blei.