Ka maham

Rev. B.P. Pohsngap

Ka maham ka long ka ktien kaba shai haduh kata kata, kaba khang pyrshah ia kano kano ka jingjia ka ban sa jia ne ban iada ia ka ban wan. Ha kane ka aiom kaba ngi don mynta, hapdeng u bnai March 2020, kyndit la wan ka “MAHAM” na ka sorkar (Govt) ba don burom jong ka Ri India bad ruh na ka jaka Meghalaya, ba ngi dei ban shong ha ki ing ki ing, ban nym leit shano shano, bad ka sorkar ka la ai syndon da ka korphiw ka adong ban iaid ban ieng da ka por bad ban nym ia lang ne ia jan iwei ia iwei pat.

Kane ka “MAHAM” ba ngin iada na uta u khniang jingpang (corona virus). Ngi iohsngew na kylleng ka pyrthei, ki bym Kohnguh ia ka “MAHAM”, ynda ki la ngat ha ka jingpang ki sa babe. Kane ka khubor kaba U Blei U buh ha ka dohnud jong nga ban kren ne ban thoh, ym dei ba phah mano mano, hynrei na kaei kaba iohsngew ba ka ktien U Blei hi ka kyntu ia ki “Nongsharai”, ki Nongialap, Ki Pastor ban ai ka khubor haba iohi ia ki dak jingma ba wan jia ha kine ki sngi mynta. Na kaei kaba ngi ioh sngew, ba ki briew ki sngew khia bha haba don ba ong, Oh! Hangta hangta, ki lap ia u sniuh ha ka Bible. Don kiba phone ia nga bun ngut, baroh nga la ong ia ki, wat ngeit. Ym don jingiathuhlypa ei ei ia u sniuh, hynrei ka Bible ka iathuh ia ngi ba ngi don u sniuh, bad tang U Blei U ba tip, U Jisu U ong – Mat. 10:30, “ Wat ia u sniuh khlieh jong phi baroh la niew”.

Kane ka khubor “MAHAM” nga kwah ban pynpaw lyngkot lyngkot, ha ki lai tylli ki bynta:-
Kaba Nyngkong:- Ka jingmaham U Blei ia ka jait bynriew Israel. U Blei U la iohi ba ki khun Israel, kan poi ka por ba kin ia kynduh ia ki nongiathuhlypa ba lamler (False Prophets). Ka kitab Deuteronomy13:1-5, “ Lada u nongiathuhlypa u la mih hapdeng jong phi, lane u nongphohsniew ia ki jingphohsniew, bad u ai ha me ka dak lane ka jingphylla… to wat shah shukor ia uta u nongiathuhlypa”. Ka hukum ha kato ka por, ka dei ban pyniap noh ia u, Namar u la pynphai noh ia ki na ka lynti U Trai. Don kiba leh nongiathuhlypa kiba kren kopsop (presumptuous) khlem da pynshongnia ne pyrkhat, ne haba kim ioh bor na U Blei. Deut 18:22. “ Haba u nongiathuhlypa u kren ha ka kyrteng jong U Trai, lada kata ka ktien kam urlong kumta, lymne kam jia, ia kata ka ktien kein U Trai Um shym la kren, hynrei uta u nongiathuhlypa u la kren da kaba kop sop, men nym sheptieng ia u” kane ka long ka jingmaham jong U Blei hi.
Kaba Ar :- Ka jingmaham ki nongiathuhlypa ba shisha jong U Blei: (i.) U Isaiah uwei U ba la kren maham Isa. 9:15., “ U nongiathuhlypa U ba hikai lamler, u long ka tdong” (The Prophets teacheth lies, he is the tail”). Bun ki briew mynta, haba kren da ki briew kiba la buh bha ka jingshaniah, ki la kham ngeit ia kita ban ia ka ktien U Blei, Namar ba kim pule hi ruh. Kaei kaba la maham U Isaiah kan sa urlong shisha. (ii.) U Jeremaiah uwei na ki nongiathuhlypa ba shisha U Blei Jer.5:30-31. “ Kaba phyla bad kaba shyrkhei ka la jia ha ka ri, “ ki nongiathuhlypa ki iathuh lypa lamler bad ki lyngdoh ki synshar da ka buit; bad u paitbah jong nga u sngewbha ba ka long kumta, te phin leh kumno ha ka jingkut jong ka”? (The prophets prophecy falsely), kine ki ar bynta ki jingjia la ong ba ki paitbah ki ia sngewbha ia ki lyngdoh kiba synshar da ka buit ruh. 14:14. “ Ynda kumta U Trai U ong ha nga, kita ki nongiathuhlypa ki iathuhlypa lamler ha ka kyrteng jong nga, ngam shym phah ma nga ia ki, lymne ngam shym hukum ia ki, lymne ngam shym kren ha ki… ka jingshukor ka dohnud jong ki hi”. (iii.) U Hosia 9:7, U ong, “ U Nongiathuhlypa u long u ba bieit, u briew u ba ioh mynsiem u lamwir”. (The spiritual man is mad) .
Kaba lai :- U Jisu ha kaba U ai ia ka “MAHAM” U ong kumne Mat.7:15, “ To sumar na ki nongiathuhlypa ba lamler, kiba wan ha phi ha ki jainkup snieh langbrot, hynrei hapoh ki long ki suri ba pynjot”. (Beware of false prophets”) Mat 24:11. “ Bun ki nongiathuhlypa lamler kin mih bad kin shukor ia shibun”. Mark 13:22-23, “ Naba ki Khrist lamler bad ki nongiathuhlypa lamler kin mih, bad kin pyni ia ki dak bad ki jingphylla ia ka ban shukor noh, lada lah wat ia kiba la jied “. Hynrei to sumar phi! Ha khmih , nga la iathuhlypa ha phi ia kiei kiei baroh”. To ngin sngap ia ka “MAHAM”, to ngin sumar ia ka mynsiem ka jingshisha bad ka mynsiem ka jingshukor. 1 Ioan 4:1, “ Ko hep baieit, wat ngeit ia ki mynsiem baroh, hynrei to phin tynjuh iit ia kita ki mynsiem, la ki long ne em na U Blei, naba shibun ki nongiathuhlypa ba lamler ki la leit mih noh sha ka pyrthei”.
To U Trai Un kyrkhu bad Un iarap ia ngi ba ngin ioh ia ka jingstad bad ka jingshemphang ba ngin Kohnguh bad ngin sngap ia ka “MAHAM”, na ka ktien U Blei.. AMEN…