Na ka T. 10 lak, lum u MDC Mawhati ia ki nongialam shnong ka Mawrong Road

Nongpoh: U Bah Charles Marngar, MDC ka Mawhati, mynta ka sngi u la khot ia baroh ki nongialam shnong ka thain Mawrong Road, na ka bynta ban iakren halor ka jingeh ki paidbah baduk, kiba la iakynduh ha kaba kum kane ka por bad ha kajuh ruh ban iakren halor kumno ban tehlakam ia ka jingsaphriang u COVID-19.

Katei ka jingleit kynduh rangbah shnong da utei u MDC ka Mawhati, ka long ruh kum kawei na ki lad ban wad jingtip halor ka jingdon ki briew kiba duk bad kiba donkam shisha ia ka jingiarap, na ka bynta ban ioh ia ka bam ka dih, khamtam ha kaba kum kan ka por ba dang don ka pakhang shnong hapoh ka Ri hi baroh kawei.

La sngewthuh ba katei ka jinglum rangbah shnong da utei u MDC, ka long ba u kwah ban pyntrei hok ia ka song jingiarap kaba T. 10 lak na ka KHADC, kaba la ai sha baroh ki MDC, na ka bynta ban iarap ia kiba duk bad ruh ban tehlakam ia u khniang jingpang COVID-19.
Na katei ka T. 10 lak kaba ka KHADC ka la aiti sha baroh ki MDC, utei u MDC ka Mawhati u la don ia ka jingthmu ban iarap ia kito ki longiing kiba duk tasam kiba don hapoh ka Konstitwensi bad katei ka jingkynduh ia ki nongialam shnong ka la sdang mynne bad utei u MDC, u la ong ba un sa leit ha manla ki thain ban iakren bad ki nongialam shnong, khnang ba kito ki longiing kiba duk shisha kin ioh ia ka jingiarap.
Ha katei ka jingiakynduhlang, ki la don haduh 24 ngut tam ki rangbah shnong jong katei ka thain lem bad ki riew rangbah, kiba la iatai sani bha halor katei ka jingthmu da utei MDC bad ha kaba kut ki la ioh ia ka jubab bad kata ka long ba ka jingpyntip halor ki longiing baduk yn bah khlieh da ki nongialam shnong bad ki ban sa phah ia ka kyrteng sha u MDC.
Lyngba katei ka jingialang, kitei ki rangbah shnong ki la pynsngew ia ka sur jingdawa sha ka sorkar bad kata ka long ba ki la kyntu ia ka sorkar ba ka dei ban don ia ka jingithuh kaba kyrpang ia ki nongialam shnong, namar ha kaba kum kane ka por wat ki nongialam shnong ruh ki jynjar bha, ha ka leit ka wan na bynta ki kam shnong kam thaw bad khamtam eh kaba iadei ba ki mar bam mar dih jong ki paidbah ha shnong ha thaw.