Ka jingjia ba la thmu da U Blei hi

Rev. B.P.Pohsngap,
Sohryngkham

Ki jingjia ha ka pyrthei baroh, ngim dei ban sngewphylla Namar ym don ka ban jia khlem ka jingthmu ka jong U Blei. Kumno ngin tip ia kata?. Dei da kaba ngi pule na ka ktien U Blei hi. U Blei U thaw ia ka pyrthei bad ia ki bynriew baroh, ki don hapoh ka bor ka jingbuh ryntih jong U hi. Na ka ktien U Blei, ngin tip shaphang U Blei bad ia ka jingthmu jong U baroh.

Ka Proberb U Solomon u khun U Dabid , U syiem Israel 20:18, “ Ia ki jingthmu baroh la pynskhem da ka jingpyrkhat”. Kumba U Blei U la thaw ia u briew ha ka dur jong U hi, ba ia kiei kiei baroh ba U thmu U da pynskhem ia kata. Kumta ruh kane ka long kaba la thmu skhem U Blei hi ban pynjia. Kawei pa kawei ka snem ba la leit ne kaban sa wan, ka don ha ka por U Blei hi ban pyndep ia kaba la thmu baroh. Ki ktien U Nongiathuh khana Eklesiastis 3:1, “ Don ka aiom ia kiei kiei baroh, bad ka por ia ki jingthmu baroh hapoh ka bneng”. Ngi shong ha kane ka khyndew kaba long hapoh ka bneng hi (ka haw haw) bad ia kiei kiei baroh kiba wan jia dei ba la thmu hi da U Blei.

Ka jingiathuhlypa ki Nongiathuhlypa ha kine ki sngi jong ngi, ym don Nongiathuhlypa Namar ba la dep iathuhlypa hi da ka ktien U Blei, ba la thoh ia kata kaba la iathuhlypa. U Isaiah uwei na ki Nongiathuhlypa ba khraw jong U Blei, ba U Blei hi U la pynlong Nongiathuhlypa, U la kren ia kane 14:26. “ Kane ka long ka jingthmu ba la thmu halor ka khyndew baroh”. Bad kane ka long ka kti ba la kner halor ki jaitbynriew baroh”. Ka long tang ia ngi ban pynshisha beit ba kane ka long na U Blei, bad ngim don daw ban ong Balei. Haba ngi peit na ki jingjia ba U Blei U ju shah ia ki bynriew ha ka pyrthei , teng teng na ka “ jingsarong ka burom”, ba ki briew kim pyrkhat Blei shuh, dei hangta U Blei U pyndep ia kaba U la thmu.
U juh u Nongiathuhlypa u ong, 23:9, “ U Trai ki pait U la thmu ia kaban pyntngit ia ka jingsarong ka burom baroh, ban pynjah burom ia kiba don burom jong ka Ri baroh”. Da shisha ka jingsarong ka burom te la i palat ka juk mynta, kane te yn pyndep shisha ba ki briew kin pyrkhat Blei, da shisha. U juh u Nongiathuhlypa U la iohi ia kane 46:10 – 11. “ U ba da iathuh ia kaba kut naduh kaba sdang, bad ia kiei kiei ki bym pat leh naduh mynbarim, da kaba ong, ka jingthmu jong nga kan ieng bad ngan leh ia la ka jingsngewbha baroh, nga da khot ia u sim bam pyut na mihngi, ia u briew ka jingthmu jong nga na ka ri ba jngai; nga la kren, te ngan pyndep ruh ia ka, nga la thmu te ngan pyndep ruh ia ka, nga la thmu ngan leh ruh ia kata”. Lyngba kane ka jingjia, ong u nongiathuhlypa Jeremaiah 51:29 – 30. “ Te ka Ri ka khynniuh bad ka pang suh, naba ki jingthmu U Trai pyrshah ia ka Babilon ki ieng, ia ka ban pynlong ka jingkynjah ia ka ri Babilon, ka bym shong briew kein; ki riewkhlain ki la wai noh ban ialeh, ki shu sah ha la ki kut, ka bor jong ki ka la duh”. Ynda haba U Blei Un ktah shisha, uei u riewkhlain u ban nud ban pyneh, haba U Blei U pynpaw ia la ka bor.
U Jisu U Khun U Blei, U kyntu ia kiba ngeit ba kin sumar hapdeng ki jingjynjar Mat 24:4,5 -8. “ Te U Jisu U la iathuh bad U la ong ha ki, To sumar ba uno uno ruh un nym shukor ia phi”. …. Naba ka dei ba kine kiei kiei baroh kin long, hynrei kaba kut kam pat la jia”. “ Hynrei kine baroh ki long tang ki jingsdang ki jingjynjar”. U Jisu U la iathuh lypa ba kine kin jia kylleng ki jaka.
U Apostol Paul U ba long uwei na ki “ riewkhuid” na ka jingaiei U Blei, u ba long u Nongialap sha ki jentil u ong, Ephes 3:9-11. “ Ban pynsngewthuh ia ki briew baroh, kaei ka jingpyniaid ka jingmaian, kaba la buhrieh na bymjukut ha U Blei U ba la thaw ia kiei kiei baroh, khnang ban ioh pyntip mynta ha ki jingsynshar, ha ki bor ki jaka bneng, da ka Balang ia ka jingstad ba bun syrtap ka jong U Blei, katba kum ka jingthmu bymjukut, ia kaba U la thmu ha U Khrist Jisu U ba U Trai jong ngi”.
To ngin tip ia kane baroh, ka jingjia ba la thmu hi da U Blei. Pynbeit bha ia la ka jingim lada kan jia ia phi ia nga, ngin don ha ka kti jong U Blei hi . AMEN……..