“Shitaiew!”

AIS Suja

Hangne ngim shym iakren ia ka shi taiew jong ki bnai ne da kaba ong 4 taiew long shi bnai. Hynrei hangne ngi ia kren ia ki taiew bad ka shitaiew kaba katkum na ka Bible ia kaba u Daniel u la kren ne thoh ha ka Kitab u Daniel 9:20-27.

Ka mut ia ki sngi por bad ki snem kiba jlan tam kiba la dep iaid bad ba dang iaid mynta bad ban sa kut kita ki por kiba jlan tam da ki hajar hajar ki snem ba kan wan noh kata kaba khadduh ka Taiew kaba mut ki 7 snem.

Ngi hap ban iakren ia kane na ka por sha ka por namar ba kata ka por jingaiei u Blei ka la jan ban kut noh halor ki Ri bad ki hima pyrthei lane halor ki Jentil. Halor kine ki jinglong jingman ngi iohi ki don bun bah ki dak lyngba ki jingjia ha ka pyrthei ka mariang. Ki briew ki lah ban batai shibun ki jingbatai stad jong ki, hynrei kiei kiei kim ju jia khlem ka tip jong u Blei, kumta ha sawdong jong ngi ngi iohi ki dak ka por ki sngi ba khadduh ha shwa ba ka por jingaiei kan kut bad kan sdang KA SHITAIEW.
Ka shitaiew ne ka Taiew bakhadduh ba la ong ha u Daniel 9:27, kan sdang ha ka sngi ban iateh Jutang jingiasuk (Peace Treaty) hapdeng ka Israel ka Palestine bad ki Ri Arab kum ka Iran, Iraq, Syria, Egypt, Jordan, Lebanon bad kiwei de ki Ri Arabs. Ka jutang jingiasuk kaba shai kdar ka long ba haba kine ki Ri kin iateh jutang, ka pyni ba ka la sdang ka shitaiew ne shitaiew kaba khadduh ban long 70 Taiew. Daniel 9:24.
Kumba ka long haduh mynta, ka Israel ka la dep pynkhreh (ready) ia ki tiar jingdonkam baroh ban ioh pynieng ia kata ka Temple kaba Lai (Third Temple) ha Jerusalem, hynrei haduh mynta hi ki dang ap ia ka por, ka hukum nangno kan wan!?
Hynrei ngi tip ba ynda ka por ka jia ka hukum kan mih bad kata ka long hajan mynta. Ka shitaiew, Daniel 9:27 kan long ka por kaba kut, bad ngin hap ban rung ia kane kaba kut, (end of times) ka por ba jynjar tam kaba ka pyrthei kam kwah ban tip ne iohsngew hynrei kaba ym lah lait.
Kan dei ka por kaba kut ka Balang kaba iaid lyngba ki jingtynjuh kaba la ri la sumar ia ka ktien u Blei haduh ba kut ki sngi, bad kane ka thew ia u briew uba ngeit uba iaineh haduh kaba kut, namar tang uba iaineh haduh bakut un ioh lait im. U Blei u ong – “Naba pha la ri skhem ia ka ktien ka jingiaishah jong nga, te Nga ruh Ngan ri kyndong ia pha ha ka por ka jingtynjuh ka ban sa jia long ha pyrthei (hapoh ka shitaiew Daniel 9:27) baroh kawei, ban tynjuh kein (testing) ia kita kiba shong ha ka khyndew (Pyrthei)” Jingpynpaw 3:10.
Ka shitaiew, ka dei ka aiom ot ban pyn iakhlad ia u kew na u niut: ka lyngkha ka long kane ka pyrthei. Kiei ki symbai ba bha ki long ki Khun ka Hima u Blei. Kita ki niut ki dei ki Khun u bymman (soitan). Uta u nongshun babet ia ki u long u soitan. Kata ka aiom ot ka long KABA WAI NOH KANE KA PYRTHEI. Kita ki nongot ki dei ki Angel. Mathaios 13:38-39. Kumta, ym don por shuh, mynta hi ka dei ka por ban kylla bamut noh bad phai na ki lynti bymman, namar ka por jingaiei (Grace period) jong u Blei ka la jan ban kut noh, ban ioh sdang ‘Ka shitaiew, ba la ong ha u Daniel 9:27.
Ha kane ka shitaiew yn pynkhein ia kata ka Jutang (Peace Treaty) hamar pdeng jong kata ka shi taiew kan long ka por jingtynjuh ba shyrkhei ia ki briew baroh ha pyrthei. Daniel 9:27 / Mathaios 24:21. Ka daw ka long namar ba ka ieng ka ‘Jingijli ba pynduh’ ha ka Temple ha Jerusalem. Mathaios 24:15, ka por ba u soitan u synshar kein.
Na kata ka daw, “Suk uta uba pule bad kita kiba iohsngew ia ki ktien jong kane ka jingiathuhlypa, kiba sumar ia kita kiei kiei IA KIBA LA THOH HA KA: NAMAR KATA KA IA KA LA JAN” Jingpynpaw 1:3. Amen.