Shillong: U Dr. Jemino Mawthoh mynta ka sngi u la thoh shithi sha u myntri rangbah ka jylla Meghalaya u Conrad K Sangma haba dei bad ki lad ki lynti ban tehlakam ia ka jing wan pur ka jing pang ‘Corona Virus’ hapoh ka jylla.
Na ka liang u Dr. Jemino Mawthoh u la kyntu ba ka sorkar ka dei ban long ba phikir bha ha baroh ki khyrdop khappud jong ka jylla na ka bynta ban khanglad ia ka jing wan pur ka jing pang ‘corona virus’ hapoh ka jylla. U bah Jemino Mawthoh u la kyntu ia ka sorkar ban pynkhlain shuh shuh ia ki rukom ‘screen’ ia ki paidbah ba thmu wan rung shapoh ka jylla Meghalaya.
U Dr. Jemino Mawthoh u la ai buit sha ka sorkar ba ka dei ban ia treilang bad baroh ki tnat ka sorkar, ki rangbah shnong, nong synshar shnong lem bad ki riew paidbah na ka bynta ban thaw da ka ‘Emergency Operation Centres’ ha man la ki district ka jylla ban phikir ia ka jing pang corona virus.
Haba dei bad ki mar bam mar dih, na ka liang u Dr. Jemino Mawthoh u la kyntu ia ka sorkar Meghalaya ba ka dei ban don ka jing phikir bad ka jing khein haba dei bad ka jing ia thied ia die ia ki marbam na ka bynta ban pynioh lang ia baroh ki paidbah ka jylla. U la ong ruh ba ka sorkar ka dei ban pyllait paidbah ia baroh ki dor jong ki mar bam khnang baroh ki paidbah ka jylla kin tip ia ki dor jong ki mar ha man la ki dukan.
Ka long ka jingshisha bad ka sngewdei ruh ba ia ka dor dei ban pyllait paidbah bad khamtam ka list ki dor dei ban tah ha kito ki dukan hi lane ha ki kot khubor ba baroh ki briew kin tip.