Phah ka Sorkar ia ki DC, ban bthah ia ki nongkhaii ban leit kit marbam na Guwahati ne Khanapara

Shillong: U symbud Myntri Rangbah ka jylla u bah Prestone Tyngsong, haba iakren bad ki lad pathai khubor, u la iathuh ba ka sorkar ka la bthah ia baroh ki Deputy Commissioner, ba kin ia kren bad ki nong khaii ha ki district ba kin leit ban kit ia ki marbam na Guwahati ne na Khanapara ban pynpoi sha ki iew ban die sha ki paidbah.

U Bah Prestone Tynsong, u la iathuh ba ka jingphah jong ka sorkar ia ka jingbthah sha ki DC haka ba iadei bad ka iadie ia thied ia ki marbam ha ki iew ka long ban pynthikna ba ki marbam kin poi lut sha baroh ki shnong ki thaw ha ka jylla.

U la ong ruh ba kumba long baroh shi katta ka sorkar kam lah ban tuklar ha kaba iadei bad ki iew ha hat, hynrei mynta kam banse ban tuklar hadien ba bun na ki shnong ki ud ia ka jingbym poi u Khaw sha ki thain nong kyndong.

U la ong ruh ba ka jingbym pynpoi ia u khaw sha ki thain nongkyndong ka long ba ka don ka jingkhaii tang shiliang, bad kane kan wanrah jingjynjar ia ki paidbah lada ym poi u khaw sha kine ki thain nongkyndong, kumta na ka liang ka sorkar ka hap ban tuklar khang ban ymdon kano kano ka jingduna u khaw ha baroh ki shnong ki ba don ha jylla.

U la ong ruh ba lada baroh ki wankit ia ki marbam tang na Shillong kan long kaba shem jingeh, kumta ki la pynbeit ba kin phah hi noh ia ki nongkhaii ba kin leit kit hi na Khanapara namar ka stock ha Khanapara ka dang bun bad ha kine ki khynniat por kin sa pynbeit ia ki nongkhaii ba kin lah ban leit kit hi.

U la buh ruh ia ka jingmaham ia ki nongdie ki ba die tamdor ia ki marbam baroh bad bthah ruh ia ki DC ban peit ba kam dei ban don ka jingdie tamdor ia ki marbam hynrei ki dei ban die kat kum ka dor ba la buh ka dei ban long katkum ka dor kaba la buh.

Ha kaba iadei bad ka jingkhang jong ka Assam ia ki truk kit marbam na ka jylla ba kin leit Kit marbam na Assam u la ong ba na ka liang jong u myntri rangbah ka jylla Meghalaya u Conrad K Sangma u la dep iakren bad u myntri rangbah ka jylla Assam ban peit ba ki kali na Meghalaya ki ba leit kit ia ki marbam na Assam kim dei ban shah pynthud.