Pdiang ki nongbylla ia ka rai ka sorkar ban ai T. 1 hajar shi taiew

Shillong: Ka Workers Power of Meghalaya (WPoM) bad ka Thma U Rangli Juki (TUR) ki pdiang sngewbha ia ka rai bad jingpynbna jong ka Sorkar Jylla Meghalaya ban ai jingiarap pisa ia ki nongbylla sngi kiba la duh ka kamai bad jakpoh na ka daw ka jingkhang shnong ha kine ki por ba iakhun pyrshah ia ka khlam Corona ne Covid19.

Ha kine ki khyndiat sngi ba la lah ka Sorkar jylla ka la pynmih ia ka hukum ban ai jingiarap pisa 1000 tyngka shitaiew ia ki nongbylla misteri kiba shna iing bad ba ym bit ban beh kam ne pynduh tulop ia ki nongtrei kiba trei ha ki jaka treikam Sorkar bad riewshimet tang namar ba ki pep trei ha ki sngi pakhang shnong na ka daw ka khlam Corona.

Ka Workers power of Meghalaya bad ka TUR ha ka 22 bad 23 tarik u Lber 2020 ki la phah ia ki dorkhas sha u Myntri Rangbah ka Jylla ha kaba la kyrpad bad dawa ba ka Sorkar kan shim ia ka jingkit khlieh ban ai jingiarap pisa bad ban iada ia ka kamai bad jakpoh jong baroh ki nongbylla sngi ha ka Jylla kiba kynthup ia ki nongdie jingdie ha madan, ki nongtrei iing, ki nongtrei kynta, ki nonghikai skul private, ki nongtrei casual,ki nongsengkam lajong kiba rit ne duna ka baiseng bad kiwei de ki nongbylla sngi kiba trei kiwei pat ki jait kam bad kiba kamai na kti ha shyntur.
Kumta ka Workers Power of Meghalaya bad ka TUR ki pynpaw ka jingsngewkmen bad sngewnguh ia ka Sorkar Jylla bad ki pdiang ia ka rai bad ka jingpynbna kaba thymmai ba ka Sorkar ka la pynbna ha ka 28 March 2020 ba ka Sorkar lyngba ka tnat Labour bad Disaster ki la pynkhreh ban ai jingiarap pisa ia ki nongbylla sngi ha ka Jylla kiba la duh ia ka kamai bad jakpoh ha ki sngi ba pakhang shnong. Kumta ka Workers Power of Meghalaya ka kyntu ia baroh ki nongtrei nongbylla sngi ban shim ia kane ka lad jingiarap pisa ba ka Sorkar ka la pynkhreh bad ka ngeit skhem ruh ba ka jingpynkhreh bad jingpynbeit kin long kiba shai bad ba baroh ki nongbylla sngi hapoh ka Jylla kin ioh ia kane ka jingiarap khlem da pyniapher Niam ne Jaidbynriew bad khlem da leh shiliang khmat iano iano ruh.
Ka jingiarap pisa kan long ia ki nongbylla sngi, tangba laitnoh ki misteri shna iing ne kiba shna jingshna,ki nongbylla 100 sngi,ki muster roll,ki nongtrei casual kiba trei bad ka Sorkar Jylla bad ruh kiba trei bad ki kynhun ba kyrshan ka Sorkar namar kine ki don da kiwei pat ki lad jingiarap.
Ki nongbylla sngi kiba la duh ia ka kamai bad jakpoh ha kine ki sngi ba don ka pakhang shnong kin pyntip sha ka State Emergency Operation Centre da kaba shu phone ha u nomber 1070 bad ym donkam siew.
Ki nongbylla sngi kin iathuh bad pyntip ia ki jingdonkam kum ka kyrteng pura, ka jaka sah, ka jaitkam batrei, ka EPIC number, Phone number, ka bank account bad IFSC code.
Ki nongbylla sngi ki lah ban phone ha une u nomber 1070 ha lane shuwa ka 3 tarik Iaiong 2020.