Mynsaw u rangbah, naba shah tynrah masi ha Nongshluid

Uwei u briew uba la tip kyrteng u Kretis Skhemiew u la mynsaw da ka jingshah tynrah noh ha u masi myn hynnin ka sngi (24/3/20) hapoh ka Shnong Nongshluid bad la pynkit noh mar mar shapoh Mawsynram CHC ban ioh ia ki lad jingsumar kiba kham kloi ha kaba iadei bad ka koit ka khiah. Utei u nongpang ba la mynsaw u dei ruh napoh shnong Nongshluid kaba hap hapoh ka Mawsynram C&RD Block bad ruh hapoh ka jingkhmih jingpeit napoh Mawsynram CHC jongka Jylla Meghalaya.

Kaba sngewsih kalong ba hynnin ka sngi ynda kiba ha ïing kila poi hapoh Mawsynram CHC ka jubab kaba kila ioh kalong ba ymlah ban sumar namar ba ymdon doctor bad la phah noh kloi kloi ban pynkit shapoh NEIGRIHMS Hospital, Shillong na ka bynta ki jingsumar kiba donkam. Kiba haïing jong utei u nongpang haba ki tip ba hakum kine ki sngi kiba baroh kawei ka Jylla kadon hapdeng ka curfew lyngba ka jingiada kaba kyrpang na bynta baroh ki nongshong shong hapoh ka Jylla halor u COVID-19 (Corona Virus), kila pyrshang ban pan da ka kali kit nongpang (Ambulance) kaba don hapoh Mawsynarm CHC ban pynkit ia utei nongpang shapoh Shillong hynrei nakaliang jong ki nongtrei jong katei ka CHC ruh kila kyntait ban ai ia ka Ambulance da kaba jubab ban ong ba ka Ambulance ka la duh noh namar ba kamlong ban iaid. Kumta ruh nakaliang jong kiba haïing mar mar ki la shimwai noh da ka Sumo napoh Mawsynram ban pynkit ia utei u nongpang khlem da salia shuh namar haba shem kum kitei ki jingjia hynrei wat la katta ruh katkum ka jingiathuh jong kiba haïing kila ong ba kadon ka jingshah bat ha lynti bad shah tohkit ha ki pulit haba ki iohi ba iaid ka kali tourist ha kum kane kapor hynrei wat la katta ruh ki pulit kila pynlait haba ki iohi ba katei ka kali ka kit nongpang.

Hadien ba utei u briew uba la mynsaw u la ioh iaka jingsumar kaba donkam lyngba ka NEIGRIHMS Hospital Shillong, hynne ka sngi napoh katei ka Hospital ruh ki la pynlait noh ia u ban leitphai noh sha Shnong namar ki la iohi shai ba kam lei lei shuh ka jingmong kaba don hapoh ka met jong u lyngba ki jingsumar kaba ki la dep ai ia u.

Nakaliang jongnga kum uwei na ki nong treimon sngewbha napoh ka thaiñ Mawsynram haba nga iohsngew ia kaba kum katei ka jingjia nga dap da ka jingsngew lyngngoh kaba khraw ban iohsngew ia kaba kum katei ka jubab kaba la mih napoh Mawsynram CHC haduh ba kan wanrah pynban iaka jingkulmar jingmut kaba khraw khamtam ia ki paidbah kiba donkam iaka jingiarap lyngba katei ka CHC bad nga da pynrem jur ia ka jingbymlah jong ki nongtrei jong katei ka CHC ban shim khia ne wat ban ai ka jingsumar kaba paka wat tang ia i jingjia ba mynsaw iba rit tam.

Ka jingkylli kaba mih mynta kalong ba shaei ki don ki doctor kiba la dep ban thung hapoh katei ka CHC lyngba ka tnat jong ka koit ka khia jong ka Sorkar Jylla khamtam ha kum kine ki sngi kiba baroh ngi ia kynduh jingeh khamtam ha ka leit ka wan. Balei katei ka Ambulance jong ka Mawsynram CHC kaba don ia u number ML 01 7874 kaba dang thymmai bad kaba dang shu dep ruh ban register ha u bnai June jong u snem 2019 hapoh jong u Director, National Health Mission (NHM) jong ka Sorkar Jylla ka la duh noh ne ymlong shuh wat ban pynkit nongpang bad balei ba lada kalong kumta, hato nakaliang jong ki nongtrei kimlah seh mar mar ban shimkhia ban pyntip shapoh ophis na ka bynta ban ioh lad ban pyndonkam biang iaka. Shano ruh ka Ambulance 108 kadon mynta haba iohi ba don kum kitei ki jingjia, hato ki nongtrei jong katei ka CHC kimlah seh ban bthah da kaba pynkitnoh da ka Ambulance 108?. Kane kan wanrah pynban ia ka jingduh jingmyntoi kaba khraw ia ki paidbah nonghong shnong jongka thaiñ baroh kawei haba phai hakaliang jongka koit ka khiah.

Haba phai khyndiat ia kaba la dep noh haba iohi ia kawei pat ka Ambulance jong ka Mawsynram CHC kaba don ia u number ML 01 6032 kaba dei napoh ka ophis jong u DHS – cum – Jt. Mission Director jong ka Sorkar Jylla, la shu ieh khongreng haduh kat mynta kine ki sngi naduh ba la dep ban jia aksiden naduh u snem ba la leitnoh khlem da lah ban leh eiei shuh ne wat ban pynbha pat iaka haduh ba kala long ka jingduh nong kaba khraw bad duh jingmyntoi ia ki paidbah nongshong shnong jong ka thaiñ Mawsynram haduh kine ki sngi wat hadien ruh ba la ioh pat da kawei ka Ambulance hapoh katei ka CHC.

Watla ym iohlad ban iakynduh ia ki bor ba dei peit jong ka tnad ka koit ka khiah jong ka Jylla, hynrei nga kyntu jur iaki ba kin shimkhia da kaba thawlad kumno ban wanrah ia ka jingmyntoi da kaba iarap ia ki paidbah jong katei ka thaiñ khamtam ha kaba iadei bad ka koit ka khiah kum ha kine ki sngi kiba baroh ngi tipshai ba balei ngi donkam ia ka koit ka khiah. Bad ha kawei ruh ka bynta ba lada katei ka CHC kamlah ban ai ia ka jingshakri sha ki paidbah nga sngew ban ong ba kam don jingmyntoi ban plie iaka bad ruh nakaliang jong ka Tnad ka koit ka khia jong ka Sorkar Jylla kan sngewbha ban khang shuwa ia ka shipor khamtam lada ymlah ban pynbiang ia ki nongtrei naduh ki Doctor, Nurse bad kiwei kiwei katkum ka jingdonkam haba don ka jingdawa na bynta u paidbah jong katei ka thaiñ.

Na kaliang jongnga nga ai khublei ruh ia u MLA jong ka Mawsynram Constituency Bah H. M. Shangpliang uba la kloi ban shimkhia wat hapdeng ipor iba lyngkot da kaba iarap ia katei ka longing kaba la iakynduh ia kane ka jingjia bad ruh nga da kwah eh ba nakaliang jong u kum u nongmihkhmat jong ka thaiñ un shimkhia lem ban khmih ia ka jingtreikam jong ka Mawsynram CHC khnang ba ki paidbah kin nym iakynduh jingeh na kapor sha kapor.

Uba phah ia kane ka kyrwoh

Sd/-
Bah Banshai Marbaniang
Social Avtivist
Mawsynram Block
Meghalaya, EKHD