Nongpoh: U Bah Sosthenes Sohtun, MLA ka Jirang Constituency, u la kyntu ia ki paidbah hapoh ka Ri Bhoi lem bad ha kiwei ki District kiba don hapoh ka jylla, ba ki dei ban ai ka jingiatreilang bad ban buh ryntih ia kiei kiba ka sorkar jylla ka la pynbeit, na ka bynta ban khanglad halor ka jingsaphriang u Khniang jingpang Corona Virus (COVID-19), uba la saphriang ha kylleng ki Ri ha ka pyrthei.
Ka nongrim kaba la pynlong ia utei u Nongmihkhmat ka Jirang ba un kyntu ia ki paidbah ba ki dei ban ai ka jingiatreilang bad ka sorkar halor ka jingthmu ban khanglad ia u khniang jingpang Corona Virus, kadei hadien ba u la iohi bad lap ba bun na ki paidbah ki shim sting bad kim khein kor ia kiei ki jingbthah da ka sorkar jylla, namar bun na ki paidbah ki mih ban iaid kai ha surok wat ha ki kynta, kiba ka sorkar jyllla ki la pynmih ia ka hukum ba ki paidbah ki dei ban shongkhop ha ki iing ki sem, khang ba iada na ka jingsaphriang utei u khniang jingpang, uba la saphriang ha manla ki ri ka pyrthei.
Utei u nongmihkhmat ka Jirang, u la kyntu ruh ia ki paidbah ba kim dei ban tieng palat na ki khubor pyntieng lyngba ki Social Media, hynrei ki dei ban bud beit buh ryntih ia ki jingbatai na ki bor sorkar jong ka Meghalaya bad uba la ong ruh ba ha kiba kum kine ki por ki don bun ki riew shimkabu, kiba la pyrshang ban pynsaphriang ia ki khubor lamler bad kiba pynkulmar khlieh ia ki paidbah.
Namarkata, na ka liang utei u MLA u ka kyntu ia ki paidbah ba ki sngap ia kaei ka jingbthah na ka sorkar, kata ka long ba ki dei ban shongkhop hapoh ki iing ki sem bad ban kiar na kaba mih na la ki jong ki iing ki sem, khnang ba ka jingthmu jong ka sorkar ban tehlakam ia ka jingsaphriang jong utei u khniang jingpang kan long kaba jop, u la bynrap.
Phi don ban ong eiei?