Pynrem ka NESO halor ka jing shah kren bein bad shah thomber ki samla NE

Shillong: Ka seng North East Students’ Organisation (NESO) ka ba kynthup lang ia ki sengbhalang na kylleng ka thain lam mihngi kum ka Khasi Students’ Union(KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) bad ka All Arunachal Pradesh Students’ Union (AAPSU) ka la pynrem jur ia ka jing shah kren bein ki samla pule bad kiba trei na ka kiwei pat ki jylla jong ka ri India hadien ba saphriang ka jing pang ‘Corona Virus’.

Kumba shu pynkynmaw la bun ngut ki samla ka thain lam mihngi ki la shah kren bein da ki kyntien ‘Corona’ ha ki briew jong kiwei pat ki jylla ka ri India.

Na ka liang ka NESO ka kyntu ia ka sorkar pdeng ban tuklar halor ka jing shah kren bein bad shah thombor ki samla ka thain lam mihngi, ka seng ka kyntu ruh ia baroh ki myntri rangbah jong ki jylla ka thain lam mihngi ban shim khia halor kane ka mat na ka bynta ban tehlakam ia ka jing shah ban bein ki samla ka thain lam mihngi.