Wat pynrung dkhot thymmai shuh, ong ka sorkar sha ka HNLC “Ka jingwad ia u ksiang, ka dang iaid”

Shillong, 29 Nailar:
Ka sorkar Jylla, ka la bthah ia ka seng HNLC, ba kan sangeh noh, ha kaba pynrung dkhot thymmai bad ha kajuh ka por, ba kan sangeh ruh, na ki kam ialeh pyrshah sorkar, kiba long beain, na ka bynta ban ioh ia ka shongsuk shongsain bad ka roi ka par ha ka Jylla hi baroh kawei.
Ka sorkar Jylla, ka ai jingiaroh ruh ia ka jingai jubab jong ka seng kaikhlaw HNLC, ban wan shakhmat, sha ka miej jongiakren, kumba la tyrwa da ka sorkar Jylla bad ba kin ioh ia ki lad jingiarap, na ka bynta ki dkhot jong ka seng, kiba kynthup, ba kin sdang ia ka jingim thymmai jongki.
Ka sorkar Jylla, ha ka jingpynmih khubor, ka pynsngew ba ka dang pynkhreh ia ka lynti iaid jongka, ban bteng sha khmat bad ban pynpoi sha ka phang kaba dei bad ban jied ruh ia u ksiang halor katei ka kam.
Hadien ka jingkren sngi laitluid jong U Mukul Sangma, ha kaba ula tyrwa ia ki seng kaikhlaw, ba kin wan sha ka miej iakren bad ka sorkar, ka dei tang ka HNLC, kaba la pynpaw, ia ka jingkwah ban iakren, katba ka GNLA, ka seng kaikhlaw ba triem ha Garo Hills, ka la kyntait ia katei ka jingtyrwa jong ka sorkar jylla, hynrei, ka la rai ba kan iakhun beit da ka bor jong ki ktang suloi, ban ioh ia kaei kaba ka angnud.