Yn die lilam noh ka sorkar ia ki bos saw kiba sniew

Shillong, 28 Nailar:
Ka sorkar ka la pynkhreh ban shu die mar jot noh na lilam noh ia baroh ki bos sawkhmat bad ki maxi kiba la sniew bad ki bym lah shuh ban shna pynbha.
Ka tnad pynroi ka la shim ia kane ka sien jam hadien ba bun ki bos bad ki maxi ki la sniew ki bym lah shuh ban iaid ban kamai ha ka nongbah. Katkum ka jingiathuh jong ka myntri ka tnad pynroi sor, ia kane ka jingthmu la iakren hadien ba don bun ki bos kiba la sniew palat ba shem jingeh ban shna pynbha.
Tang ki bos kiba pyniaid ka Synroplang SHG na ki 18 tyllli kiba sniew na ki 88 tylli katba na ki 120 tylli ki kali saw barit ne ki Shillong Supplementary Public Transport Services (SSPTS) 40 tylli ki la sniew.
“Ngin die lilam noh ia kito ki bos bad ki maxi kiba sniew ban ioh pynbha shuh shuh ia kiba dang biang khnang ban lah ban bteng ia ka jingshakri sha ki paidbah”, la ong ka Kong Ampareen Lyng doh ka myntri ka tnad pynroi sor.
Ka Kong Ampareen ka la iathuh ba ka sorkar kan ioh shuh shuh sa 240 tylli ki bos ban pyniaid ha kane ka nongbah bad ha khapsor.
“Ia kine ki bos thym mai yn aiti aiti pyniaid biang ha ki kynhun shimet kumba la leh, bad ngi kyrmen ba hadien ba ki paidbah ki la ioh mad ne shem ia ka jingiaid kine ki bos ha kine ki snem ba la dep, kin sa don bun kiban wan shakhmat ban shimti ban pyniaid ia ki bos”, la ong shuh shuh ka Kong Ampareen.
Ka la ong ba ia ki bos saw khmut la ioh na ka sorkar India lyngba ka JNNURM katba ia ki maxi ka thied na ka jingiarap pisa na ka 13th Finance Commission ka sorkar India.
Ha kaba iadei bad ki bos barim, ka sorkar ka la iateh bad ki nongpyniaid ba bai pynbha ia ki yn ot na ka jingmih kaba 10 percent na ka jingmih ka bai kamai.