Ka shuki jong nga ka skhem, ong u Dr Mukul

Shillong 29 Nailar:
Hapdeng ka jingkhih phaloh ban pynkhyllem noh na ka shuki Myntri Rangbah da ki paralok MLA ka Congress jong u, pynban u Myntri Rangbah u Dr Mukul Sangma u la kyntait ba ka shuki jongu ka don hapdeng ka jingma.
Haba kren shwa ban leit sha Delhi hynne ka sngi, u Dr Mukul u la ong, “Ka shuki jong nga ka skhem kam shym khih eiei”, .
“Ngan leit sha Delhi mynta ym ban iakren ia ki kam party hynrei na ka bynta ki kam jong ka jylla bad ngan sa iathuh ynda nga la wan phai”, la ong Dr Mukul mar ia mih na ka jingialang jong ka MPRIL ha Polo hynne ka sngi.
U la ong ruh ba um don por ban iakren ia ka jingiakhih namar ba u bunkam ban pyrkhat ia ki kam ki kam jong ka jylla. “Nga bunkam bha ngam don por ban iakren ia ki kam party, bad kam don kano kano ka jingsyier ia ka shuki”, la ong u Dr Mukul.
Hynrei ha kawei ka liang, ka khubor kumba la paw, ka shuki jong u Dr Mukul ka la khih bha hadien ba ar ngut ki Myntri Rangbah barim ka jylla U Salseng C Marak bad u Bah DD Lapang ki la leit iakynduh ia ka Sonia Gandhi ban dawa weng noh ia u Dr Mukul kum u nongialam ka party da kaba ai bun ki daw khamtam ka jingsniew ka shong suk shong sain ha ka thain Garo Hills.
Watla u Dr Mukul um iathuh ba u leit sha Delhi, hynrei la sma ba ka jingleit jongu sha Delhi ka long ban pan bor na ka Sonia ban sloit shuki noh ia ki katto katne ki myntri ha kane ka sorkar jongu kiba leh phoilian ban pynkhih.
Ka jingiakhih ka la shit bha mynta hapdeng ki MLA ka Congress namar ba baroh ar liang ka kynhun jong u Dr Mukul bad ka kynhun jong u Bah Lapang ki la iakam ba ki ioh ia ka jingbun paid, hynrei baroh ka shong ha ka rai jong ka Sonia ban ai ia ka rai.