Ki KYNTHEI: Kumno ban long ki kynthei kiba khlain bad skhem jingmut

Kong Linda Kongwang

Baroh ngi tip bad iohsngew man laka por ba “ka kynthei kaba stad ka tei iaka longiing hynrei ka kynthei kaba bieit ka pynjot iala ka longiing”. Kadei, namar naka kynthei lah ban saindur iala ka longiing longsem bad ban pyniar iaka pyrthei. Ban peit ban sumar iaka iing ka sem, ka kam ka jam, ka shet ka tiew, ban kha ban pun bad ban pynbiang iaki jingdonkam jongbaroh kadei shisha ka bor ba phylla baki ioh. Hynrei kine baroh ki jingaiti lut met bad mynsiem ban trei naka bynta ka bha ka miat jong baroh ka pyntlot noh khambun na ki kynthei lyngba ki jingshah lehbein, shah thombor bad wat ban shah leh beijot ruh kaba ialam shaka jingbanbor jong ka jingmut jingpyrkhat bad kthang mynsiem. Teng teng kine baroh ki ialam shaka jingbthat jubor iala ka jingim.

Phi lah ban iohi ba bun ki briew ki kham burom ban ngeit iaki kynthei kiba khlain bad skhem jingmut, kiba lah ban ieng hala ki jong ki kjat, kiba ym donkam ban ap khmih lynti tang na kiwei ban bsa iaki.Ngi ngeit ba lada phi shem jingeh, kum ka kynthei phin ialeh ban tem ia kino kino ki jingeh kiba wan haka jingim jongphi, ym ban long ki riew lanot, phin ym kwah ruh ban long kiba shah kdew kti haka jingim hynrei phi ieng bad phi ialeh iaka pyrthei daka jingkhie khlieh bad thum haka dohnud jongphi.

Phi ju iohi ruh bunsien ba ki kynthei kiba khlain ki don lypa haki katto katne ka jingsngew kyrpang shaphang jongki bad ki long shlur bad skhem jingmut kat shaba ki leit. Khambun ki kynthei ki ngeit ba ki kham lehkmen haba ki laitluit, skhem jingmut halade bad ka pynkhlain iaka jingmut jingpyrkhat jongki. Hynrei ban long kum ki kynthei kiba khlain, i kumba kam long kaba suk ban poi sha ka thong jong ka jingim jongki. Kampher kumno phi iohi ialade mynta hynrei phi lah dakaba suk ban long ka kynthei kaba khlain bad laitluit. Hangne ka jingthoh ka thmu ban pyni iaphi katto katne ki jingai jingmut ban lait naki jingshah lehbein, shah niewbein bad ban ieng hala ki jong ki kjat ban long ka kynthei kaba khlain pura.

1. Wad ia ka jingpynleit jingmut kaba dei:— Ym lah ban len bun ki kynthei ki shah kynnoh bad shah leh kynshleiñ man ka por haki jaka trei jongki. Lada phi kwah ban lait nakine, pynleit jingmut tang haki kam baphi trei bad kiar naki briew kiba kren khlem akor ne kiba kren shaphang ka jingim shimet jongphi. Haba ki kynthei ki kiew haka liang ka kam ka jam kaba ki trei bad pynleit jingmut tang haki iingthmu jongki, kham niar kin shah kynnoh, shah lehbein ne ban shah leh kynshleiñ. Ki shynrang te ki shynrang, kim lah khlem da leh samla iaki kynthei hynrei haba ki iohi iaki jingtrei shitom bad skhem jingmut jongphi, kin nang burom kylla iaphi. Namar kata nyngkong eh ban long ka kynthei kaba khlain phi dei ban long kiba shlur kiba skhem jingmut bad kiba trei minot tang haki kam kiba dei.
2. Bud ia ki nuksa jongkiwei pat ki kynthei kiba khlaiñ bad shlur:—- Ban bud iaki nuksa jong kiwei pat ki kynthei kiba skhem jingmut bad khlaiñ ka bor pyrkhat kan ai jingmyntoi shikatdei eh iaphi. Kan kyntiew iaka rukom pyrkhat khamtam naka bynta ka jingbha jongka jingim. Ki kynthei ki long khlaiñ bad shlur dei namar ka jingtrei shitom, ka jingminot bad ka jingshlur halade kaba ai mynsiem iaki ban don ka jingshaniah halade. Namar kata ban long kum ma ki, nyngkong eh phi dei ban don ka jingshaniah halade, ka jingtrei shitom bad ka jingshlur, borabor ki ju sei ia u soh uba thiang haka jingim. Lada baroh ki kynthei kin trei shitom bad shlur ban ieng hala ki jong ki kjat, khlem pep kin kynkiew ialade, iaka iing ka sem, iaka imlang sahlang bad iaka ri hi baroh kawei. Pyrkhat halade lada kiwei kilah balei phim lah? Kane kan ai mynsiem iaphi ban ialeh haka jingim bad ka jingpyrshang kan khambha ban iakaba shu sngapjar ban lait naki jingshah lehbein ne shah niewbein haka jingim. [yn dang bteng]