Pynkhein hukum ka Assam:Hima Nongspung

Shillong, 28 Nailar:
Ka Hima Nong spung ka la kynnoh ba ka Assam ka la pynkhein ia ka hukum jong kaKashari High Courtda kaba wan rah da ka bording bad ka um ha ki shnong kkiba hap hapoh ka Hima Nong spung.
Ka Hima ka la byr then ruh ba kan leit sha Kashari lada ka sorkar jylla ka sngap mynthi halor kane. “ka Assam dang shen ka la wanrah bording bad ka um sha ki khyndai tylli ki shnong ha kane ka Hima bad la paw shai ba ka Assam ka la pynkhein ia ka hukum jong ka High Court mynshemsnem”, la ong u Secretary ka Hima Nongspung u Bah Michael Warjri mynta ka sngi haba kren sha ki lad pathai khubor.
Ki shnong ba ka Assam ka la wanrah ia ki projek ki kynthup ha Ranibari, Bilpara, Patkang, Halher, Bakhlapara, Lungkhung, Jimbrikang, Hawla bad ha Bernongsai.
Katkum ka jingong u Bah Warjri, ka Assam kala aiti ia ki jaka jong ka Hima Nongspung hakhmat ka Kashari High Court ha ka 25tarik Naitung hadien ba ka Hima ka la ujor pyrshah ha u snem 2009 ia ka jingwan skud jaka jong ka Assam ban shna surok na shnong Patkang sha Bakhlapara kiba hap hapoh ka jingpeit ka Hima Nongspung ha Ri Bhoi district.
U Bah Warjri u la ong ba ka kashari High Court ha ka 5tarik Lber 2010 ka la pynmih ia ka hukum ia ka Assam ban sahngeh ssi syndon ban shna ia ka surok na Patkang sha Bakhlapara, Halher, Ranibari, Akhoinijira, new Balakhawa, Balakhawa bad Bernongsai.
U la ong ba kane ka jingwan skud jong ka sorkar Assam kadei namar ba sorkar Meghalaya kam lah ban wanrah ia ka roi ka par ha kine ki thain.
“Kane ka jingleh jong ka sorkar Assam ka long thik kumba pynkhein ia ka hukum jong ka Kashari”, la ong u Bah Warjri.
Ka Hima Nongspung ka la phah ia ka jingujor sha ka sorkar jylla bad kummjuh sha ka District Council bad kumjuh sha u Myntri Rangbah ka jylla bad ruh sha u SC ka Ri Bhoi District ba kin leh eiei halor kane ka jingwan skud jaka ka sorkar Assam.
Ha kajuh ka por ka Hima Nongspung ka dawa ban pynioh biang ia ka ki khlaw bad ia ki lyngkha rep slasha kaba ka sorkar Assam ka la wan ban skud ia kine ki jaka naduh u snem 1972.
“Ngin sa phah jingthoh sha ka sorkar Assam ba kadei ban pynbiang biang ia ka khlaw ka btap bad ia ka kper slasha sha ka Hima,” la ong u Bah Warjri bad la bynrap ba kine ki jaka ki don ka jingheh kaba 10 sq km ka la aiti da ka sorkar phareng sha ka Hima ha u snem1887.