Nang kiewdor ka MLA Skhim

Bah RM Shabong

Ka sorkar U Conrad Sangma, ka la nang pynkiew ia ka MLA skhim, na ka T.2klur sha ka T.2.5klur nangne shakhmat bad katei ka jingmut, ka long ba nangne shakhmat uwei uwei U MLA, un ioh ban pynlut T.2.5 klur shisnem, na ka bynta ban iarap ia kito kiba thep vote ia u ha ka Constituency.

Haduh mynta, ngi iohi ba ka MLA Skhim, kam don kyndon satia bad U MLA, u lah ban thied shamoit, thied pela plastik, thied borti niut, lane u lah ban sam hi da ka pisa beit beit sha kito kiba dei ban ioh bad katei ka pisa, ka dei namarkata ka pisa bam nokot jong ki nongthep vote bad haduh mynta (naduh ba la pyntrei kam ia ka MLA Skhim), ngim pat iohi, la katei ka skhim, ka la pynmyntoi iano, lane ka la iarap pynjop elekshon iano, hynrei la imat, ba ka la shu dei tang ka pisa ia bam maphot da kito kiba don sha ka liang U MLA uba jop.

Ha ka MP skhim, la iohi ba ka jing pyniaid ka kham pher, ha kaba ki don ki jait jingtrei, kiba hap ha katei ka skhim bad nangta ka kam ruh, ka iaid lyngba U Deputy Commissioner, hynrei ha ka MLA skhim, ka dei beit ka bor jong U MLA, ha kaba u leh katba u sngew bit dalade hi.

Lada ngi shu khein antad, ia ka pisa kaba T.150klur ha ka shisnem, kaba leit lyngba katei ka skhim, kumta lada ngin jin da la pynlut noh sha kiwei pat ki lad jing iarap, kan jin da la long ka jing myntoi kaba khraw (khamtam ha kane ka juk Corona), ha kaba yn lah ban ai dawai ia kiba pang, ai ja ia kiba thngan, ai jain ia kiba duk bad kumta ter ter; hynrei katei ka don la ka jong ka jingthmu bad dei na kata ka daw, ba ki nongthep vote, ki lalot tasam ha kine ki sngi bad ki khmih lynti ruh ban ioh pisa, na ka bynta ban leit thep vote.

Ka jingiakren namarkata ia katei ka mat, kam don jingmut eiei ruh em, namar ba kat uba long MLA, un kwah hi ia katei ka skhim bad kat uba rem elekshon, un dawa ban pynduh noh ia katei ka skhim bad uba dang jop, lada u ioh T.2.5klur ruh un nym hun satia, hynrei un nang dawa shuh ban nang kyntiew ia katei ka skhim bad ngin sa iohi ba ha ki snem, ki ban sa wan, kan sa poi lehse sha ka phew klur na ka bynta uwei U MLA bad katei kan dei hi beit beit ka skhim thied vote bad katei ka dei namarkata ka jing hikai, kaba pyn jyrsieh shibun ia ka sain pyrthei bad kaba hikai ruh ia ki paidbah, ba kin lalot pisa, namar ki tip ba katei ka klur, ka don ha pla U MLA.