Ka jingkyrpad ia ki paidbah khamtam ki nongsynshar shnong ka jylla Meghalaya

Hadien ka jingpynbna u Prime Minister ba ki paidbah ki la dei ban pynkhreh ia lade kumba pynkhreh ia ka thma ha kum kane ka por ngi sngewdei ban ai jingmut kyrkieh kumne harum :

1. Ka don lehse ka jingkyrmen ba lada ia pynlong ka jingshong iing bun kynta kan lah ban iada ia kiba bun ki paidbah na ka jingpur u khniang jingpang bad kan iarap ia ki bor jong ka Koit ka Khiah kiba la sdang ki program ban pynkhreh ia ki lad jingiada, haba ym pat don dawai sumar na ka bynta une u jait jingpang.
2. Katkum ka jingpynbna ka bor World Health Organisation (WHO) baroh kiba don ki dak jingshitom ki dei ban shim khia ban shong iing ban bad pyntip sha ki bor sorkar bad la kyntu ia baroh ban ia shong jngai iwei na iwei kumba 3 foot.
3. Balei ngi dei ban shim khia ka long namar ka skul bah ba pawnam ha pyrthei ka Johnhopkins University & Medicine – ka pynpaw ha ka website ba ka jingiabit na une u khniang Covid-19 ha baroh kawei ka pyrthei haduh mynin baroh ka la poi sha ka 2,44,517 (na kine 80,000 tam ki dei ha China, ha Italy kumba 40,000 kaba la kiew kynsan na ka 10,000 ngut, ka USA katkum ki khubor 13,000 ngut) bad kiba la iap na katei ka jingpangiabit ka long 10,030,(palat 3200 kiba la iap ha China), bad kiba la jem na kitei ki long kumba 86,025 bad kiba dang sah ki dang don hapdeng ka jingsumar.
4. Lyngba kane ka jingpynshai namar ka jingbun ki samla shynrang bad kynthei khamtam kiba la wan phai iing na shabar ha kine ki shi taiew khamtam kiba na ki jylla kiba la don ia une u jingpang, ngi da kyntu jur ia ki bor Shnong bad ki Dorbar Dong bapher bapher ban kyntu ia ki nongshongshnong ha la dong kiba dang shu wan na shabar jylla ba kin wan shakhmat ban shim ka jingkitkhlieh ban shim khia ban pyntip sha ka Health Dept (108) kum shibynta ban iada ialade bad ban iada ia ki bahaiing ha sem.
5. Ban iai shah bad ban pynsngeh kyrkieh ia baroh ki jingialang ki program bad ba ki Dorbar Shnong kin ia pyrkhat kumno ban ia leh lada ka don ka jingiap briew ba sngewsih hapoh shnong ha kum kine ki por khamtam ha kine ki sngi ha kaba une u khniang jingpang u la paw dur ha palat phra tylli ki jylla ka Ri India ( Maharastra, Kerala, Delhi, Gujarat, Andhra Pradesh, UP, Pynjab bad Bengal) .
6. Ngi kyntu ia ki Dorbar Shnonng ban pyrkhat kyrkieh ban shim khia ban pynkhlain ia la ki Health Committee hapoh shnong lyngba ka SMS ne WhatsAap lane Telegram ban pynbna pynkynmaw hapoh shnong ia ka jingdonkam ban ialeh khuid da kaba sait kti da ka sabon bad ban pynbiang lum lupa ia Census Shnong.
7. Nalor kitei ki jingai jingmut kaba kham khia kaba kyrkieh ka long ban wad jintip lupa katno ngut hapoh dong ne shnong kiba shu im jah kpoh da kaba shu bylla man ka sngi lane kiba duk kiba shitom namar kane ka jingjia kan sa ktah lut ka kamai kajih, lada iai khang Shnong ban iada ia ka jingim kine kiba shitom ha ka kamai kajih kin ioh bam kumno kaei ka jingpynkhreh ka Dong ka Shnong bad ka Sorkar Jylla halor kane ka phang kaba donkam bha.

Khatduh kumba la iai ban na basdang donkam ka jingiatreilang jong ki paidbah ban ialeh ban pynduh ia une u khniang jingpangbaiabit, uba haduh mynta ym pat don dawai, kumta ngi kyntu jur ia baroh ki paidbah ban ia treilang ban shim khia ia baroh ki jingpathai khubor ka Sorkar Jylla bad Sorkar India.

Ngi ai mynsiem ia baroh kiba don ha ki kam ka koit ka khiah kiban hap mih shakhmat ha kum kane ka por bad ngi ai khublei ia ka Sorkar Jylla bad Sorkar India kaba la shim khia ban thaw ki lad jingiada bad lehse kin dang bun ki jingpynbna nangne shakhmat namar kane ka kam kan sa shimpor katkum ki stad scientist ym duna ia ka 18 bnai.

Ngi wer ia baroh ban ia treilang bad ki jingkyrpad u Shri. Narendra Modi, Prime Minister, ka Ri India uba la kyntu ia ki paidbah ban shim ia kane ka jingpynkhreh kum ba pynkhreh ia ka thma ha kaba baroh ngi la hap pynkhreh lupa bad ngi kyntu ia baroh ban shong iing ym ban ia mih ia shang hapoh Dong ne hapoh Shnong ha ka 22 tarik March 2020 naduh 7 baje mynstep haduh 9 baje janmiet, namar wat lada u la kreh ha ka ktien Hindi katkum ki jingsngewthuh jong ngi ki kyntien u Prime Minister ka Ri India ki long kiba khia haduh katta katta.

Ngi kyrmen bad ngi ngeit skhem ba ki stad kot ka pyrthei kin long kiba jop ha ka jingwad jong ki ban ioh ia u dawai uban pynduh jait ia une u khniang jingpangiabit.

Khublei,

Bah John F Kharshiing,

Adviser & Spokesperson,

Federation of Khasi States.