Na dukan sha Demseiniong, kem ki pulit ia u bah Jyllud Kurup tiar pynheh ksah bad ka kali

Shillong,26 Nailar:
Hadien ba la ioh bun ki jingujor, bad ha dien ba la wad la slem bha, ki pulit ka nongbah Shillong mynta ka sngi ki la ioh ban kem ia u David Lyngdoh uba ki ju khot u Raja bad uba ju tip kum u bah ‘Jyllud’. Ha ka por shiteng sngi eiei mynta ka sngi hat majai, hadien ba la ioh jingtip kaba thikna ia ka jaka ba u bah Jyllud u don, ki pulit ka Special Cell ki la leit ban kem suk ia u na kawei ka dukan-sha kaba don ha Dem seiniong, Shillong katba u dang dih sha.
Hadien ba la ioh kem ki pulit ki la phah ialam ia u sha ka ingsah jong u , bad u la ialam ia ki ha ka ing shongwai jong u kaba don ha Langkyrding Mihngi.Na ingsah u bah Jyllud ki pulit ki la ioh ban kurup shi set ki tiar pynheh ksah ( Gym), ka pisa T.200 tyngka kaba da ki lut T.10 suda, ki jain ki nep, ka Torch Light, ki tiar Mechanic, bad la kurup ruh ia kawei ka kali Maruti Zen kaba dei ka kali ka lok jong u.
Katkum ka jingtip kaba la ioh lum , la iathuh ba u bah Jyllud u dei na ka shnong Nongspung bad ka lok jong u ruh ka dei na katei hi ka juh ka shnong bad ki sah wai ha Langkyrding. Ki mar kiba ki pulit ki la kurup na u bah Jyllud ki dei ki mar jong u hi, iathuh ki lad khubor tangba la suba jur ba ki dei ki mar ba u la thied da ki pisa tuh.
Katkum ka khubor pulit, la iathuh ba u bah Jyllud ( David Lyngdoh) uba na Langkyrding Shyiap la kem da ki pulit ka special Cell mynta ka sngi ha ka por shiteng sngi eiei. Kham mynshuwa u la shah kem haduh saw sien ha ki pulit namar ka jingdonkti jong u ha ki kam tuh bad ki kam thok pisa. Kham mynshuwa, ki paidbah ki la shong syier namar ki kam pyntriem u bah Jyllud uba ju leit ban rung tuh sha ing briew, na ka bynta ban tuh bad ban Jyllud ia ka met ki kynthei briew.