Sam dawai ei ka HNM ha Umsning ia ki paidbah nongshong shnong

Nongpoh, 26 Nailar:
Kum shi bynta ban iarap ia ki longïing kiba duk ba kyrduh ha ka pang ka shitom jong ki, ka Hynñiewtrep National Movement (HNM), kan pynlong ia ka jingsam dawai ei ne ka free medical health camp na ka bynta jong ki ha Umsning ha ka 27 tarik Nailar, 2014, kaba dei ruh ka Sngi Ïew Umsning (Umni) la pyntip u Bah E Kharnaior, vice president ka HNM, Ri-Bhoi district.
Ka seng ka kyrpad ia ki nongshong shnong ka thaiñ ba kin sngewbha ban wan sha kane ka jingai dawai ei ha katei ka Sngi, bad ba kin pynsngew ha khmat ki nongsumar pang ia ki jingshitom ba don ha ki met ki phad jong ki ia kaba yn pynlong ha Umsning Auditorium Hall bad ban sdang naduh ka por 10 baje mynstep, u la ong.
Kumta ka seng ka kyrpad ia ki paidbah na kylleng ki shnong ka thaiñ Umsning ba kin sngewbha ban wan sha katei ka jingsumar ei, khnang ba kan iarap ia ki ban ioh ia ki dawai bym donkam ban thied bad ki jingsumar ei na ki nongsumar pang kiba tbit na ki jaka sumar ka district bad na sor Shillong.