Shillong: U myntri rangbah ka jylla u Conrad K Sangma mynta ka janmiet hapoh ka ing dorbar thaw ain ka jylla, u la wanrah da ka ‘Resolution’ ban dawa na ka sorkar India ban pyllait lut ia ka jylla Meghalaya na ka jing treikam ka Citizenship Amendment Act 2019 (CAA).
Kumban shu pynkynmaw ka CAA 2019 ka lah ban treikam ha ki jaka ka jylla Meghalaya ki bym hap ha ka 6th Schedule kata kumba 3 percent kiba kynthup ia ki jaka jong ka Khyndai Lad, Municipal bad ka Forest Colony bad kiwei kiwei.
Na ka liang u myntri rangbah ka jylla u Conrad K Sangma haba jubab ia ki jing kylli na ka liang pyrshah hapoh ka ing dorbar u la ong kum shi bynta ban iada ia ki trai ri trai muluk ka jylla, ka sorkar Meghalaya ka wanrah da ka ‘Resolution’ ban dawa na ka sorkar India ba dei ban pyllait lut ia ka jylla Meghalaya na ka jing treikam ka CAA 2019.
“Ki don 27 tylli ki Municipal Wards bad kumba 23 tylli ki hap hapoh ka 6th Schedule bad 4 tylli ki lait na ka 6th Schedule, namar kata ka sorkar Meghalaya ka dawa na ka sorkar India ba dei ban pyllait lut ia baroh ka jylla na ka CAA 2019” u la bynrap
Haba jubab ia ka jing kylli ba ka sorkar Meghalaya kadei ban phah weng noh ia ka CAA, na ka liang u myntri rangbah ka jylla u la ong ba ka sorkar Meghalaya kan nym lah ban btah ia ka sorkar pdeng ban phah weng noh ia ka CAA 2019 namar ia ka ain la dep pynteikam lyngbak ja jing ioh mynjur ha baroh ar tylli ki ing dorbar thaw ain ka ri Indati kata ka Lok Sabha bad ka Rajya Sabha.
U Conrad K Sangma hapoh ka ing dorbar ka jylla kum shibynta ban dawa na ka sorkar pdeng ban pyllait ia ka jylla na ka CAA 2019, u la ong ba ka ing dorbar ka jylla kan dawa tyngeh na ka sorkar India ba dei ban pyllait baroh 100 percent ia ka jylla Meghalaya na ka jing treikam ka CAA 2019.
Balei u c m bad ki myntri ki kwah resolution ban dawa na ka sorkar pdeng ban pyllait caa ia ka meghalaya. Balei um ong to ngin iai leit ban pynbor ia ka sorkar pdeng ban pyntrei kam noh kloi ia ka ILP ha Meghalaya, imat don ei ei sha lyndet (dal mai kala hai).