T.4580 shi trok u dewiong, hap thep pisa ki nongkhaii

Shillong,26 Nailar:
Ka sorkar jylla ka la pynbna paidbah ba na bynta ban pyniaid beit ia ka jinglum khajna kaba hapoh ka Central Sales Tax Act 1956, baroh ki nongkhaii dewiong kiba la ioh ia ka Sertiphiket ba ki la dep rejistar , ki dei ban thep pisa lypa katkum ka jingdawa bad ka jingbthah jong ki bor ba ki la Rejistar, bad katei ka jingthep pisa lypa kan long na bynta kawei pa kawei ka trok kit dewiong kaba pyniaid shalan lyngba ka Taxation Check Post kaba dei tang hapoh ka jylla.
Ka sorkar ka la pynbna ruh ba na bynta ki trok kiba kit hapoh ka 9 Metric Ton ka pisa ba ki hap ban thep lypa na bynta ka shi trok u dewiong ba ki thmu ban pyniaid ka dei T.2170 tyngka shi trok, katba ki trok kiba kit hapoh ka 19 Metric Ton pat ki hap ban thep pisa lypa T.4580 tyngka shi trok u dewiong. La pyntip paidbah ruh ba katei ka jingpynbna kan treikan noh mardor naduh ba mih kane ka khubor.