6kynta shisngi, khang trok 12 shaka, sha Mawlai

Shillong,25 Nailar:
Ki ar sengbhalang na Mawlai ka FKJGP bad ka KSU Mawlai Circle, mynta ka lah sngi u Blei ki la leit ia kynduh ia u Additional Deputy Commissioner ka East Khasi Hills u bah CVD Dieng doh ban ia kren ia ki jingeh kiba ka Mawlai ka ia kynduh, namar ka jingiaid laitlan palat ki trok kit bam ka FCI kiba rung katba mon ha Mawlai.
U samla Marbud Dkhar haba kren sha u nongthohkhubor u la iathuh ba ha katei ka jingiakynduh jong ki nongialam kitei ki ar seng ia u ADC, ki la ioh ban pynpaw ha u ia ki jingeh kiba ka Mawlai ka iakynduh na ka daw ka jingrung laitlan kitei ki trok kit bam kiba rung khlem por katba ki mon hapoh Mawlai. Kawei na ki jingeh kaba utei u nongialam ka FKJGP u la kdew ka dei ka jingdheng kali kaba jur hapoh Mawlai kaba la mih na ka daw kitei ki trok 12 bad 14 shaka ha ki thain ka Mawlai. U la kdew ruh ba ka jingdheng kali ka buh jingeh ia ki khynnah skul namar ba kitei ki trok ki iaid khlem por la ka long mynstep, mynsngi ne mynmiet.
Kawei pat ka jingeh kaba ki nong Mawlai ki ia kynduh na kitei ki trok FCI, u samla Marbud u la ong ba ka jing wanrung kitei ki trok ka jan kot spah tylli ha ka shisngi, bad don ruh kiba sahmiet ha surok, kiba shet ba tiew ha surok bad ki la shu ia pynieng beit kat haba lait jaka, u la ong ba katei ruh ka dei ka jingma ia ki nongshong shnong ka Mawlai namarba ym ithuh kiba kumno ki briew kiba don ha ki trok la kiba bha ne kiba sniew. U la ong ba ka jingbym don ka jaka ieng kali kaba biang ( parking) ka dei ka daw jong katei ka jingeh, kaba na ka liang u Rangbah Shnong ka Mawroh, u la ujor bunsien hynrei ym don ba sngap, iathuh utei u nongialam sengbhalang.
Shuh shuh ha katei ka jingiakren u President ka FKJGP, u la ong ba ki ar seng ki la pynpaw ha u ADC ba naduh ba mih kane ka khubor, kin ym shah shuh ia ki trok 12 ne 14 shaka ban rung hapoh u pud u sam ka Mawlai, katba ia kiwei pat ki trok kin shah ban rung tang naduh ka por 7:00 haduh 11:00 baje mynstep bad 2:00 haduh 4:00 baje noh phai sngi. U la ong ruh ba ki sengbhalang kin buddien ia kane ba ki trok 12/14 shaka, kim dei shuh ban rung bad ba kiwei pat ki trok ki dei ban iaid katkum ka por ba la buh bad lada jia ba ki ialeh pyrshah lane pynkhein ki ar seng kin shim da kawei pat ka rai ban pynshitom.
Hadien katei ka jingiakren u samla Marbud u la iathuh ba na ka u ADC, u la kular ba shen un sa khot jingialang ia ki bor pyniaid ka FCI bad kumjuh ruh ia u SP jong ka Traffic Branch ban ia kren halor kitei ki mat jingdawa ba ki ar seng ki la wan ban ia kren bad u.