Mih sa kawei ka Seng Pynbiria

Shillong,25 Nailar:
Haduh mynta ka seng pynbiria kaba ki paidbah ki tip bha ka dei ka Seng Biria U Khasi (SBUK), hynrei mynta pat la mih sa kawei pat ka seng pynbiria kaba la ai kyrteng ka ‘Kam danda u Rangdajied’. La seng ia katei ka seng ha ka 24 tarik u nailar, 2014. Ki nong kitkam katei ka Seng Biria kaba dang shu thaw thymmai ki long President- u bah Romeo Phira Rani, Vice President –U bah Paul B Synrem, Secretary u bah Philip Marwein, Assttn. Kong Genevieve Khongji, Finance Secretary bah Jropsing Nongkhlaw, Social Secretary kong Phyllis Rani, Organising Secretary bah George Arthur Warjri, la jied ruh uwei u nongai buit ai bor bad 12 ngut ki Executive Member bad ka Motto katei ka seng ba thymmai ka long ‘Syndong la ka jong’.
La seng ia katei ka seng shi bynta ka long ban tei ia ka imlang sahlang ha ka bha ka miat bad ka jingshongsuk shongsaiñ, bad ban ai noh da ka mluh kaba pynbang pynshngiam, pynkmen pynsngewbha, pynrkhie pynsngewtynnat bad pyndanda pynbiria birai, khamtam ha kine ki sngi ba ka jylla ka la kdang shoiñ da ki kam sniew kiba har-rukom kum ki kam lehnoh, kam rah suloi kaikhlaw, ki kam pyniap briew, ki kam leh-jubor, ki kam leh be-ijot, ki kam pakhang shnong pakhang thaw, ki kam politiks jakhlia, ki kam bamsap bampong bad kiwei kiwei ki kam bymman. Ia katei ka seng shen yn sa rejistar noh.