Jia aiu ia ka NPP bad ka BJP?

Bah Monarch Shabong

Ha ka sngi palei, ka BJP, ka la jan ioh ban knieh noh ia ka Executive Committee ha Garo District Council (GHADC), hynrei ka la shu lait salit, da kaba shah rem tang shi vote ha ka jing ia tynjuh bor bad kata ruh ka long, da ka bor jong u lamphang katei ka dorbar, uba pynneh jubor ia ka Executive Committee jong ka NPP ha ka Council.

Ka jing shah khanglad ban thaw ia ka EC, ka la pynlong ruh ia u dkhot ka BJP, ba un ujor ejahar ia ki pyrshah ia U CEM jong ka GHADC, halor ka jing kynnoh, ba u dei uba bamsap bad na kitei ki jingjia, la iohi shai ba ka jing ia ing makhir ha Garo Hills, ka long pleng kaba la jubor than hapdeng ka NPP bad ka paralok jongki ka BJP.

Ngim tip, ka dei ka jingbha ne ka jingsniew nusip ia ka Garo hills, namar ba ka duh synshar ka BJP ha ka Council, hynrei lada jia ba ka ioh lad ban pyniaid khlem pep, kan lah ban pyni lut ia la ki jong ki buit ki sap jongka, ha kaba niuma, kin lah ban theh ruh da ka dud bad ka ngap bad ka ksiar suda, ban pyn paw nam ia ka EC, kaba nyngkong jong ki ha ka Jylla.

Kam dei tang katta, hynrei ka mat kaba dei ban iakren, ka long ba ka don daw aiu eh, haduh katne, ha kaba ka BJP kan ia shut ing makhir pyrshah ia ka NPP, kaba dei ka paralok kaba ki ju ia iaid lang ryngkat ryngkat bad kaba ki ia trei lang ruh ha ka sorkar Jylla, hynrei lada ka BJP, ka khor bha, kumba ka long ha kine ki sngi, la imat, kumba kam slem shuh, ba kan nang tynruh bad pynthut ia kane ka sorkar synrop ha ka Jylla ruh bad lada ka long kumta, ka pyni ba ki sngi jong ka NPP, kin long kiba eh shibun nangne shakhmat.

Ka NPP, ka hap ban sngewthuh ba ka donkam ia ka BJP, kum kawei na ki paralok kaba khlain ba kan kyrshan radbah ia ka, ha ki jingdonkam jongka, ha ka sain hima sima, ha ka roi ka par bad kiwei ki jingdonkam ba bun; hynrei lada ki dak ki shin ki paw, kumba ka la jia ha kine ki sngi ha Garo Hills, kumta kan long kaba eh ia katei ka seng, ba kan tyllun marwei ban iakhun pyrshah ia ar tylli ki seng heh ka Congress bad ka BJP.

Ha ki khyndiat bnai ba ladep, la iohi ba U Bah AL Hek, uba dei u myntri jong ka sorkar MDA, ula kren shai ba ka seng BJP, kan synshar hi marwei ha ka elekshon MLA 2023 bad lada ka long kumta, kine ki jingjia kiba jia ha Garo Hills, ha Jaintia Hills, kin long tang kum i phliang dih, i ban sa nang klang suki ha ki bnai ban sa wan.