Pynlong jing duwai, na bynta ka shongsuk ha ka Jylla

Shillong: Ka Shillong Khasi Jaintia Church Leaders Forum [SKJCLF] kaba sngewkhia na ka bynta ka jingshongsuk shongshngain ha ka imlang sahlang, ka la pynlong kyrpang ia ka jingduwai na ka bynta ka Meghalaya myn Sngi Palei 12tarik u Lber 2020 por 930 mynstep ha Pinewood Hotel, Shillong.

Palat 30 ngut ki nongialam jong ka Jylla ki la iashimbynta ha kane ka jingduwai – kynthup ia u Chief Minister, Deputy CM, Speaker jong ka iing Dorbar Thaw Ain, Leader jong ka Liang pyrshah, Chief Advisor ia ka Sorkar, ki Minister bad ki MLA ryngkat bad ki dkhot ka SKJCLF.

Kane ka long ka sien kaba nyngkong ba la pynlong ia ka Jingduwai kum kane ryngkat bad ki nongialam jong ka Jylla ba ka SKJCLF ka la pynbeit, ban duwai na ka bynta ka jingialam U Blei ia ki nongialam ha ka Sorkar, ki Balang bad ka imlang sahlang ban aiti ia ka jingshakri jong ki na ka bynta ka jingroi bad jingkyntiew ia ki briew bad ka Jylla jong ngi. Ka Forum ka duwai na ka bynta ka jingsuk bad ka jingialong shipara ha ka Jylla bad ka ri baroh kawei, bad ha kajuh ka por ruh na ka bynta kito kiba la ngat ha ka jingpang Corona virus bad ki jingktah jong kane ka jingpang ha kylleng ka pyrthei.