Pynsangeh ka AIFF ia ka Santosh Trophy namar ka jingkynrei ka jingpang Coronavirus

Shillong: Ka All India Football Federation ( AIFF) ka la rai ban pynsangeh shwa ia ka wat kaba khatduh jong ka National Football Championship (Santosh Trophy) kaba la thmu ban pynlong ha u bnai ban wan ha Aizawl.
Ka jingpynsangeh ka long na ka daw ka jingkhie ka jingpang Coronavirus kaba la saphriang kylleng ka pyrthei, kynthup hapoh ri India.

Ka kyrwoh na ka Mizoram Football Association ha ka lah sngi U Blei lyngba ka sla Facebook, la ong ba ka AIFF ka la pynbna ban pynsangeh ia ka Santosh Trophy na ka daw ka jingkhie ka Coronavirus bad ia ka tarik kaba thymmai yn sa pynbeit pat hadien.Kumba ka paw ka Meghalaya ka la ioh rung sha ka wat kaba khatduh jong kane ka lympung bad ki rangialehkai ki la long ba la pynkhreh na ka bynta kane ka lympung.

Ka AIFF lyngba ka website jong ka, ka la pynbna ba ia ki lympung iaknieh jong ka FIFA World Cup Qatar 2022 bad ka AFC Asian Cup China 2023, ia kiba la thmu ban pynlong mynta u Lber bad Jylliew, la hap ban pynsangeh noh tang haduh ban da pynbna pat da kumwei.

Ha kane ka lympung ka India kan pynkhreh ban iakhun ia ka lahduh jong ka dewbah Asia, ka Qatar ha Bhubaneswar ha ka 26 tarik mynta u bnai. Kumjuh ha u Jylliew kane ka kynhun kan pynkhreh ruh ia ki ar tylli ki jingialehkai pyrshah ia ka Bangladesh ha Dhaka ha ka 4 tarik u Jylliew hashwa ban iakhun pyrshah ia ka Afghanistan ha Kolkata ha ka 9 tarik u Jylliew.