Pynjlan por ka sorkar ia ka komiti thew dewiong: Prestone

Shillong, 18 Nailar:
U Myntri khlaw ka jylla u Bah Prestone Tynsong ha kane ka sngi Nyngkong u la ong ba la pynjlan por ia ka komiti ban leit thew dewiong ba la dep tih ba la khlieh da u MS Rao u Principal Secretary ban ai ia ka kaiphod halor ka jingshem bad ka jingioh jingkhein jongka na u dewiong ba la dep tih. U Bah Tynsong u la ong ba ka komiti la pyn jlan por haduh ba kut jong une u bnai namar ba shem jingeh ban pyndep na ka jingwan u slap.
U la ong ba ka long kaba eh ia ka komiti ban leit shang sha man ki shnong ban pyndep ia ka jingpynshong dor ia u dewiong namar ka jing slap bad kiwei ki daw.
Ka komiti kan hap ban aiti ia ka kaiphod jongka haduh ba kut une u bnai.
Katkum ka jingong u Bah Tynsong, kane ka komiti thymmai ka la trei shaid shaid bad kan aiti noh ia ka kaiphod hapoh ka por ba biang.
Shwa ia kane, ha ka 1 tarik Nailar, ka NGT ha ka jingbishar ha Shillong ka la bthah ia ka sorkar ban thaw komiti thymmai ban shim jingkhein ia ka jingdon jong u deiwong ba la dep sei hapoh ar taiew.
Ha ka hukum ba pynmih thymmai ha ka 12 tarik Nailar, ka NGT ka la ong ba la ai por ban pyndep ia ka jinglum jingkhein ia u dewiong ba la dep tih haduh ba kut jong u Nailar kata ha ka 30 tarik.
Hadien ba la thung ia ka komiti thymmai namar ba ka komiti barim ba la khlieh da u Director ka Mines, u RP Marak ka bym lah ban leh ia ka kamram, ka NGT ka la bthah ia ka sorkar jylla ba kan thaw ia ka komiti thymmai bad ban pyndep ia kim bym lah ka komiti barim.
Kane ka komiti thymmai ka kynthup ia u Principal Secretary ka tnad khlaw u MS Rao, u Additional Chief Secretary u KS Kropha, Dr SS Bala Scientist na Central Pollution Board, P Gupta u Member Secretary ka Meghalaya State Pollution Control Board bad u Prof Mohmmed Javed na IIT, Guwahati.