9 jop ka Mawkhar ia ka Nongsohphoh, 3 kol pynliem ka Mawlai ia ka Umsohsun

Shillong: Ka Mawkhar SC ka la pynbam jem ia ka Nongsohphoh da 9-0 kol ha ka lympung ialehkai U-14 Football ka SSA ha ka sngi Saitjain ha madan Polo. Ia kine ki kol ka Mawkhar la thep da u B Khongsdam thep haduh hynriew kol bad khur ar tylli ki hat trick ha ka 24, 29, 61, 63, 65 bad 70 minit, katba u J Khyriem ula thep ar kol ha ka 5 bad 11 minit bad B Rynjah ula thep ha ka 44 minit.

Ha kawei ka jingialehkai, ka Mawlai Sports Club ka la pynliem da 3-0 kol ia ka Umsohsun SC. Ka nam jop jong ka Mawlai ka la wan lyngba ka hat trick u JV Langstang ha ka 3, 27, bad 32 minit.

Ha kawei pat ka jingiakhun, Lummawbah SC bad ka Mawnianglah SC ka la hap ban iasam mar shi point hadien ba ki la iakhaid khlem don mano mano ba ioh thep kol ki minit ialehkai.
Lashai ka sngi ka jingiakhun kan long hapdeng ka Mawpat SC pyrshah ia ka Nongkseh SC ha ka por 1 baje bad ka Laitkor SC pyrshah ia ka Shillong Lajong FC por 3 baje.