Shillong: Ka Revolution – Ïada la ka Ri ka pynrem jur ia ka jingkren jong u Lat ka Jylla u Tathagata Roy uba la pynsyrïem ia ka jylla Meghalaya kum ka Kashmir ha kaba iadei bad ki kam pyntriem ia ki paid hindu.
Ha ka kyrwoh ba la pyllait mynta ka sngi, u nongialam ka Iada La Ka Ri u bah Ardent M Basa iawmoit u la ong ba lah ban ong ba ka jingkren jong u Lat ka don ia kaei kaei ha lyndet ka jingthmu kaba sniew ia ka jaidbyn riew Khasi. “Ngim lah ban mutdur ba u briew uba wan ban shong hapdeng jong ngi uba ring myn siem ia ki lyer ba pyng ngad jong ka Ri Khasi baieit jong ngi, uba dih ia ki um ba shngiam ka Ri Khasi bad hapdeng ki briew kiba ieit ia ka jingsuk un khlemrain haduh katne ban pynthoh bria ia kane Ka Ri bad jaidbynriew jong ngi”, la ong u bah Ardent ha ka kyrwoh.
U la buh jingkylli, da kaba ong hato lah ban ong ba ka Sorkar India ka lah buh khnang ia u ba un thaw jingklumar ha kane ka jylla lyngba ki jingkren pyrshah jong u man la ka por ia ki trai muluk ki trai jaka?. Ka jingkren jong u ka lah pynbitar ia ka jaidbynriew bad la sngewthuh ba u kren khnang ban pyndom bad pynbitar ba ki briew kin leh ia ki kam ban pynmih jingklumar. Hynrei kum ka jaidbynriew dei ban pyni ia ka jingstad da kaba ithuh shai uei u Nongshun jong ka jaidbynriew.
“Kum ka jaidbynriew ngim dei ban shim sting ia ki jait jingkren kiba kum kine, hynrei ngi dei ban da pynshong nongrim bha ia ka jingmut bad jingthmu barieh jong ka. Lehse lyngba ki jingkren jong u ngi lah ban suba jur ba ka Sorkar BJP ha Delhi ka don ia ki jingthmu kiba rieh pyrshah ia ngi ki rit paid Khasi hangne ha jylla Meghalaya. Kumta ngin hap long kiba husiar bha nangne shakhmat”, la ong u bah Ardent.
U la bynrap, “Ngi kwah ban pynpaw ba ngim donkam ia u briew uba kum une ha kane ka jylla jong ngi”.
Ha kajuh ka por, u bah Ardent u la pyntip ba ka jingialang ki nongialam ka Iada La Ka Ri bad ki nongsynshar shnong ka thain Pynursla kan long ha ka 11 tarik Lber, 2020 por 11 baje mynstep ha Nenggate Dorbar Hall. U la kyntu ia ki nongsynshar shnong ban iapoi khnang sha kane ka jingialang kaba donkam ban iathir ia ki jingeh ka jaitbynriew.
Ha ka sngi thohdieng, U Tagatatha Roy, U Lat ka Jylla, u kren diaw mynsiem, da kaba ong ba ki bar Jylla, ki ia tyngkhuh jingeh ha kine ki sngi ha ka Jylla, la kumba ka jia ia ki Kashmiri Pandit ha ki snem 1991, ha kaba ki hap ban phet krad na ka Jylla Jammu and Kashmir.
U Roy, u iathuh ha ki kotkhubor, ba ula iakren bad u myntri rangbah ka Jylla, U Conrad Sangma, halor ka jing donkam ban wan rah mardor ia ka suk ka sain ha ka Jylla bad ha kajuh ka por, ba dei ban pynneh ia ka shongsuk shongshngain jong ki bar Jylla.
Phi don ban ong eiei?