Shillong: Kumba long haduh mynta ka kynhun United Democratic Alliance (UDA) kam pat don u nongialam thymmai hadien ba la hap shuki noh u bah Teinwel Dkhar kum u CEM ha KHADC.
Watla ki MDC ka UDP ki la jied ia u bah Titosster Well Chyne kum u nongialam ka parliamentary party (PP), hynrei kiba bun ki paralok MDC kiba don ha ka UDA naduh ka HSPDP, NPP bad MDC shimet, ki kwah ban jied hi ia u nongialam ka UDA ym ban shu pdiang ia uno uno uba wan buh ka UDP namar ba kila mad ia ka kynrum kynram kaba la mih haduh ban khyllem syndon ka Executive Committee kaba rim.
Ha ka jingioh jingtip na ki katto katne ngut ki MDC, kila pynpaw ba ki kham noh sha u bah Paul Lyngdoh ka UDP ne u bah Martle N Mukhim ka HSPDP ban shimti ia ka kam nongialam kum u CEM ka Council.
La ioh jingtip ba ki don ki MDC ka UDP ki don ka jingiapher namar don kiba kwah ia u bah Paul bad don kiba kwah ia u bah Titosster bad kumjuh ha ka NPP ruh ki don kajuh ka jingiapher jingmut.
Ki don ruh ki MDC na ki paralok ka UDA kiba kwah ia u bah Martle nalor ki MDC shimet ba un shimti ia ka shuki CEM.
Na ka liang u MDC ka HSPDP bah Sherborlang Mawlong, ula kren shai syndon ba ka HSPDP kan kham lah ban shong ha liangpyrshah lada ka UDP ka pynbor ban kyrshan ia u bah Titosster ban shimti kum u CEM. U bah Sherborlang ula ong ba ka party ka tyrwa ia u bah Paul lane ia u bah Martle ban shimti ia ka kam CEM.
Ula kynthah ia u bah Titosster ba ha ki bnai ba la dep ha ka por ba u bat kum u EM ha ka EC ba ialam bah Teinwel, u bah Sherborlang ula kynnoh ba u bah Titosster ula leh bun kiei kiei ki bym sngew tynnad ia ki MDC ba iadon lang ha ka UDA watla katta kila shu iai shah, kaba la pynlong ban hap syndon ka Executive Committee ba ialam u bah Teinwel.
Kham mynshwa, 4 ngut ki MDC kynthup bah Martle bad bah Sherborlang ka HSPDP nalor bah Lambor Malngiang u MDC shimet bad bah Batskhem Ryntathiang kila ujor sha ki nongialam ka Meghalaya Democratic Alliance (MDA) ba dei ban ailad ha ka mon laitluid ki MDC ka UDA ban jied ia u nongialam ban shimti ia ka kam CEM, ym ban shu ailad ha ka UDP, namar ba kala wanrah ka huri hura ha ka Council, kaba dang don mynta ha ka synshar Administrator rule.
Ka bym him suda kine ki. MDC jongngi,pynduh noh iakine ki MDC,ym I don jingmntoi me jingmut ,namar Tang ka bym him bym kwah,is long cem,em lut baroh ba men is him,MDC pap.