LA I SHAIONG

[ba bteng] Bah PBS
“Ym lah shuh ban bthat ia u kynjri uba teh ia u imat” ong ka kmie
“Bun ki khynnah kiba long kum ma u khamtam ha kato ka rta” ong u Kynsai.

“Toi, ym don eh kaba pher ba un leh, hynrei nga i lynga ba u la lapmiet eh hangto tang shu lait kti khyndiat” kren bynniaw ka kmie
“Lada thew tarajur u Blei la jan baroh kin poi dujok tang namar ka mobai” pyllait kynsan u Kynsai bad ka rkhie.

Mano ban lait, hato don ba kyntait? Baroh baroh ki ia mareh thong ban thied mobai khamtam kaba rem namar ki don lut ki jnit ki jnat. Kiba lait na ki tyrsim jong ka ki dei sa tang kito ki tymmen ki bym donkam ia ka namar kim nang bad kim da sngew donkam than. Ki iohthiah ngai ngai kum ki khyllung” ong u kpa.

“Shispah na ka shispah phi kren ia kaba dei pa” kren iaroh ka Banrilang.
Ki la ia sngap jar jar kumba katto katne por.

“Imat ka kut ka khana mobai mo” ong kynsan u Rangsan uba la pynlip noh ia ka data na ka mobai jong u.
“Balei me la thait ka lehkai mobai” kynthoh ka kmie.
“u ….. u la thait shuwa katto” u jubab kum bym salia.
“Katto hi te me mo lah dei hi ban ha ngi ki khmat ki la sat syllang ba ka thaba” ong u kpa.
“Da nang kein ban pynrit ia ka jingthaba” u pynphai ktien.
“Shano hi phin lah iakren bad une” ong ka km ie.
Da ka jingsngew dom u Rangsan u phet noh na kata ka kamra ba ia shongkai lang bad leit thiah sha la ka kamra. Ba ka por ruh ka la miet, kine shi khun ki la leit thiah noh sha la ka jong ka jong ka kamra.
“Imat la eh shisha ban teh lakam namar ka dei ka mar shimet jong u briew wat lada don ki skul kiba pyrkhing ia la i khynnah skul” ong biang ka menkmie bad la klum bha ia la ka met.
“Ia ka jingkwah ba shapoh jong u briew te la jynjar hi ban tem haba habar ki leh angel katba shapoh rhem ka jingmut ba bun jait. Kat ban da sngewthuh ki la kyrni bad la eh ban bthat ia ki kynjri” ong u menkpa.
“Na kata ka daw bun ki kmie ki kpa ki la shu ud shu khnuim ia ka jingi lymwir ia kiba bun” pynskhem ka menkmie.
“Lada ki klet mobai ki kloi ban leit shim na iing bad shu phah wanrah hano hano ruh” ong u menkpa.
“Ka dei kein kpa, phim kynmaw ma phi ruh shisien phi wan rung biang ha iing haba phi la poi ha phalor” pynphai ktien ka menkmie bad ka rkhie.
“Tang ma nga ruh uba la rangbah kumne shu sngew thylli bad shu sngew kumno re kumno lada khem rah mobai. Tangba ym dei eh haduh katta katta eh, kein noh phi sngewthuh bakla kmie” ong u menkpa.
“Kata te ka iapher hi kat u rangbah briew phi un pyrkhat ia ka jingkit ka iing ne un pyrkhat tang ia kaei haba la shim ka jinglong rangbah ne longkpa. Kito pat iano kin pyrkhat haba dang leit skul” ong ka menkmie bad ka saham samthiah.