Thombor, ia u MR ka Assam

U myntri rangbah ka Assam u Tarun Gogoi’ u la shah thom bor ha ki nongiakhih pyrshah mynta ka lah sngi u Blei katba u dang don ha lynti jong u na ka bynta ban leit jngoh ia ka Uriamghat kaba don ha Golaghat district khappud bad ka Naga land kaba dei ka jaka ba la jia ka jingiaumsnam.
U Gogoi um shym la mynsaw ha katei ka jingshah thombor, hynrei ar tylli ki kali kiba leit ryngkat ha katei ka jingleit jong u ki la julor, iathuh u Additional Director General of Police (Law and Order) u A P Rout. U myntri rangbah ka Assam uba ju leit jingleit ryngkat ki bor pahara kiba biang u la mih na Jorhat ban leit sha Golaghat mynta ka step lyngba ki surok kali.
Katei ka jingshah thombor u Gogoi ka la jia hajan ka jaka ai jingiarap kaba don ha Uriamghat, hynrei ha katei ka por ki nongiakhih pyrshah kiba la bitar jur ki la ia pyrta ia ki jingpyrta pyrshah ia u bad ki la ther maw sha ki nongap pahara kiba don hapoh kali , iathuh shuh shuh utei u heh pulit.
Ha katei ka jingjia la bthah ia ki nongiakhih pyrshah ba kin mih noh na katei ka jaka hynrei haba ki la pyneh ki pulit ki la bom ia ki , bad ki siat da ki kuli jri bad kumjuh ruh nki la kynshait da ka um. Uwei na ki riew paidbah u la xmynsaw jur ha ka jingshah bom ha ki pulit bad la pynkit ia u sha ka jaka sumar kaba hajan tam kaba don ha katei hi ka jaka, ong ka khubor na u Rout.
Ki dkhot jong ka Krishak Mukti Sangram Samiti ki la thang ia ka tyngshop u myntri rangbah ban pyrshah ia ka jingshah pyniap kaba la jia ha Uriamghat , kaba la kynnoh ba dei ka jingleh ki runar na ka jylla Nagaland. U Tarun Gogoi u la hap ban shong ha katei ka jaka ai jingiarap ( relif Camp) kumba san minit bad hadien kane u la ioh ban ia syllok bad ki ophisar ka tnad sorkar.
Lah ban pynkynmaw ba ha ka 12 tarik mynta u bnai , 9 ngut ki la shah pyniap ha ki runar kiba la kynnoh ba ki dei na Nagaland , bad na katei ka jingjia haduh 10 hajar ngut ki la phet shnong na ki 7 tylli ki shnong jong ka Golaghat District bad mynta ki la shong rieh tngen shipor ha ka jaka ba ki bor pyniaid District ki la pynkhreh na bynta jong ki.