Ka sorkar Jylla, kam don jingthmu ban sei pisa na Apex Bank, ong U MR

Shillong: U myntri rangbah ka jylla u Conrad K Sangma mynta ka sngi u la pynshai ba ka sorkar Meghalaya kam don jing thmu ban sei lut ka pisa na ka Meghalaya Co-Operative Apex Bank kum ba la saphriang ha ki ‘social media’.

Na ka liang u Conrad K Sangma u la kyntu ia ki paidbah ba kim dei ban don jing tieng haba dei bad ka jing duh ia ka pisa jong ki, kaba don ha ka Meghalaya Co-Operative Apex Bank.

“Wat la ka Meghalaya Co-Operative Apex Bank ka ia dei bynta bad ka ‘Yes Bank’ na ka bynta ban long kam (Technical support) haba dei bad ka jing treikam jong ka Bank, hynrei haba dei bad ka jing sei pisa ka Meghalaya Co-Operative Apex Bank kam shym la don bynta” u la bynrap.

U Conrad K Sangma u la ong ruh ba baroh ar tylli ki Bank ki la kular ban shakri hok ia ki paidbah wat ha kane ka por ba ka don jing thuh ka Bank (Yes Bank). U la ong ruh ba ka sorkar Meghalaya kam don jing thmu satia ban sei lut ia ka pisa na ka Meghalaya Co-Operative Apex Bank.

Lah ban kdew ba ki paidbah ba pyn donkam ia ka ‘Yes Bank’ ki la shem jing jynjar hadien ba ka sorkar India ka la dep sei kumba 6 hajar klur ka pisa na ka ‘Yes Bank’.

Na ka liang ka Meghalaya Co-Operative Apex Bank ka la dep ban ujor hapoh ka Sardar Thanat halor ka jing mih khubor lamler ba ka Meghalaya Co-Operative Apex Bank ruh kan sa kyrduh pisa kum ka ‘Yes Bank’.