Jynrat ka umsaw, ia ka jingkieng ha Wah Umsiang

Nongpoh, 17 Nailar:
Ka jingwan u ‘lap bah bajur bha ka la pyn long ia ka jingkieng Wah Umsiang ka ban leit sha ka shnong Umkra ban shah rat noh ha ka step jong ka sngi palei, kaba katei ka jingkieng kaba la shna da ka dieng ban iaid kali bad ba la pun na shiliang sha shiliang katei ka wah ka la shah rat ha ka umsaw ba shyrkhei bha.
Ha kane ka jingjia, namar ba ka dei dang step eh, ki nongiaid lynti kim pat don satia nalor ba ther u slap ba jur bad bun ki briew na katei ka shnong ki jaituh ban mih na la ki ïing ki sem, watla bun na ki nongshong shnong ki dei ki nongrep, kumta kam shym la don satia kano kano ka jingjia ba sngewsih ha ka jingim ki briew bad ki jingri.
Ha kaba iadei bad katei ka jingjia, na ka liang u Bah Julius K Dorphang, MLA ka thaiñ, namar katei ka shnong ka hap ha ka Mawhati Constituency, u la leit jurip hi dalade ia ka jinglong jingman jong katei ka jingkieng na ka bynta ban pynpaw ia ka jingsngew jong u kum u nongmihkhmat ki paidbah na katei ka thaiñ.
La sakhi lang ha katei ka jingjurip da ka jingdon lang u Rangbah Shnong ka shnong Umkra, u Bah P.S Umbah, ki riew rangbah jong ka shnong bad kiwei kiwei kiba la don ban jurip lang ia katei ka jingjia.
U Bah Dorphang, kum u MLA, u la ong ba kum u nongmihkhmat ka thaiñ, u la pynpaw ia ka jingsngew jong u ba kane ka jingshah rat jong ka jingkieng ka la long ka jingduhnong ia ki paidbah ba bun kiba dei ban iaid lynti ban kit ia ki mar ki mata jong ki ban leit die ne leit thied leit pet na ki jaka ïew, kum na Shillong bad Umsning bad kiwei ki jaka ba paw ha ki ïew ki hat, hynrei ka jingshah rat kan long pynban ka dieng pyngkiang ia ka leit ka wan bad khamtam eh lada ki mad ia ka pang ka shitom bad ha ki kam iap kam im.
Kumta ha kaba iadei bad kane, na ka liang jong u kum u MLA u la ong ba un sa thoh noh shen kum ka jingpyntip sha ka Deputy Commissioner (DC) jong ka Ri-Bhoi district khnang ba kan pynioh ia ki lad ki lynti ban shna pynbha biang ia katei ka jingkieng ba la shah rat.