Pynsangeh ka sorkar ia ka Tamasa ka Juk Meghalaya kaba 9 sngi

Shillong: Ka tnad jngohkai ka jylla ka la rai ban pynsangeh noh ia ka Tamasa jngohkai pyrthei kaba tip kum ka Juk Meghalaya ne Meghalayan Age kaban long khyndai sngi naduh ka 7 haduh 15 tarik Lber 2020 ha Thadlaskein, Lad Mukhla ka West Jaintia Hills.

Ka jingpynsangeh ka dei namar ka jingsyier na ka jingsaphriang ka jingpang Coronavirus, ha kaba la don ruh kiba pang na kane ka jingpang ha India.

U Myntri Rangbah ka jylla u Conrad K Sangma mynta ka sngi, haba kren sha ki lad pathai khubor, ula ong, “Namar ka jinglong jingman ha ka jylla, bad ka pyrthei bad ka jingsngew khia ia ka jingpang coronavirus, ka tnad jngohkai ka jylla, ka tnad kam pohiing kaba la iashong jingialang mynta ka sngi, kala rai ban pynsangeh noh ia ka Meghalayan Age bad kan don noh tang ka National Conclave, ka Conference ban don tang ki briew ba shah khot ym ban shuh ia ki paidbah”.

U myntri rangbah u la ong ba ka sorkar ka la pynkhreh ia kane ka tamasa la san bnai mynshwa ha kaba kam pat don kano kano ka jingjia kumba ka long mynta.

Na ka bynta kane ka tamasa ka jinglut kan kot sha ka T.4.3 klur bad la ioh ban pynbit pynbiang da ka kompeni E-Factor Entertainment Private Limited kaba don ka ophis ha New Delhi.
Ka sorkar ka la thmu ban pynlong ia kane ka tamasa ka long ban pynpaw ia ka spah ka jylla khamtam ka jinglap ki stad ia ka rta jong ki maw ha kane ka jylla, naduh 3000 snem, bad ki la ai nam ruh ia kane ka rta ka pyrthei kum ka Juk Meghalaya ne ka Meghalayan Age naduh ka 3000 snem mynshwa shaduh kine ki sngi.
Ha kine ki sngi ban pynlong ia ka Conclave, Conference, yn don tang ki briew ba la shah khot kum na ki kompeni pathai khubor kum ka BBC, Instagram, Facebook, YouTube bad kiwei.
U Myntri Rangbah u la iathuh ruh ba ka sorkar ka la phah pynsangeh ia ka International Trade Fair kaba thmu ban pynlong ha madan Iewrynghep namar ba ki briew kiban wan iashim bynta ha kane ka iew ki dei na ki ri ba marjan bad ka China kum na Thailand bad kiwei.
Kham mynshwa, u myntri rangbah u la ong ba kan don ka jingiathir ha ka sngi kut ban iadon bynta ki myntri sorkar pdeng naduh u myntri ka DoNER u Dr Jitendra Singh, u myntri kam jngohkai u Prahlad Singh Patel, u myntri tnad ialehkai u Kiren Rijiju, u myntri ka tnad Jan Shakti u Rattan Lal Kataria, bad la khot sngewbha ruh ia baroh ki myntri rangbah ka dong mihngi nalor kiwei ki heh sorkar.