Dawa plie biang ka HPWN ia ka jaka buh petrol ha Umiam

Shillong, 17 Nailar:
Ka Hynniewtrep Petroleum Worker’s Association (HPWN) ka la dawa ban plie biang ia ka jaka stok petrol ka Indian Oil Corporation Limited ha shnong Pyllun ha Umiam, Ri-Bhoi
“Ka jaka stok petrol ha Umiam kaba la trei kam ha u snem 1992 ka la khang noh ha u Rym phang 2010, wat la ka la don ka jingpyrshah jur na ka seng”, la ong u president ka HPWN u Bah Alister N Diengdoh ha ki nongthoh khubor ha kane ka sngi Saitjain.
U la ong ba um tip thikna ia ka jingkhang ia katei ka jaka buh petrol hynrei ka sorkar bad ka kompeni ka la rai ban khang noh namar ba hapoh 100 km ka jingjngai na ka jaka ba tan, ym lah ban buh ia ka jaka depot ne ka stok petrol. Ka jaka tan petrol ka don ha Beltola, Assam.
“Ngi kwah ba ka sorkar jylla kan bthah ban plie biang ia katei ka jaka buh petrol kumba don lem kiwei ki jylla kum ka Assam, Mizoram, Manipur, Nagaland bad kiwei”, la ong u Bah Diengdoh.
U la ong ba ka Meghalaya kaba don khappud bad ka Bangladesh ka long kaba donkam ban don ka jaka buh petrol.
U president ka HPWN u la ong ba ka seng na ka por sha ka por ka la ju dawa na ka sorkar ban don ka jaka thep petrol ha Shillong bad ha Tura khnang ban nym don ka jingthut ha ka jingpynpoi ia ka petrol, diesel bad ka LPG ha ka jylla lada don ka jingiakhih sha Assam.
Halor kane, na ka liang u myntri ka tnad Food and Civil Supplies u Clement Marak u la ong ba ka sorkar kan peit bad bishar ia kane khamtam ka jaka buh petrol ha Umiam.