Da u MP Candidate ka NDA ne u jong ka MDA?

Babu Kular Khongjirem

Ka kynhun sorkar synrop MDA ka la pynbna paidbah ba u president rangbah ka party NPP na Meghalaya, i Dr W.R.Kharlukhi in long u common candidate jong ka sorkar synrop MDA.Lada kane ka rai ka longkam shisha ka party NPP kan ioh 2 ngut ki MP ha parliament,kawei ka Agatha Sangma sha Lok Sabha na Tura Parliamentary constituency bad uwei pat udei i Dr W.R.Kharlukhi kum u MP sha Rajya Sabha.Lada long kumta,ka sorkar NDA jong ka BJP ha Delhi ka la nang khlain shuh shuh da kaba iohnong sa uwei u MP ha Rajya Sabha.Kane kan nang ai mynsiem ia u Narendra Modi kum u prime minister uba la duh mynsiem bha ia ka Meghalaya kum ka state kaba pyrshah ia ka CAA bad kaba dawa ia ka jingpyntreikam ia ka ILP.

Ha ki katto katne ki kot khubor khasi kiba mih mynnin ka sngi(6th Marvh 2020)ka la mih ka report ba kiba bun ki MLA kiba ia don lang ha ka sorkar synrop MDA ki ia pynpaw ba kim da hun satia ba u MP Rajya Sabha un long biang u MP jong ka sorkar NDA.

Ki don kiba la tyrwa ia ka kyrteng jong uwei pat u para Doctorate,bad uta udei i Dr Jemino Mawthoh,General secretary ka UDP ba un long kum uwei pat u candidate uba kham biang ban mihkhmat sha Rajya Sabha kum u common candidate na ka sorkar synrop MDA.Ki kham kwah imat, ban kiar ne iaid lait na ka sorkar NDA jong u Modi.Ki sngew ba lada jied ia u candidate ka NPP,ka mut hi u candidate ka NDA,hynrei lada jied na kiwei pat ki Party(UDP),un long u candidate uba dang laitluid khlem pat shah teh ne long ‘si samkhmut ha ka BJP.Kum une u candidate un da dang lah ban kren pyrshah ha Rajya Sabha ia kino kino ki issues kiba ktah ia ka ri bad ka jaitbynriew kum ka CAA ne ILP,etc.

Ka seng congress kaba don 19 ngut ki MLA ha Assemnly ka la kren shai ba kan ai ka jingkyrshan lada pynieng da u Non- NDA condidate sha Rajya Sabha.Lada kyrshan ka UDP bad kiwei ki party synrop ia i Dr Jemino Mawthoh,la tikna ba in ioh rah ia ka thong jong ka jingjop.Kan long ka sien kaba nyngkong bad ka burom ruh ia ka party riewlum UDP na Meghalaya ba kan ioh nongmihkhmat ha parliament(Rajya Sabha).Ka Election Commission ruh kan kyndit ba ka UDP kan ioh MP sha parliament.Kan pynkyndit bynriew ruh ia ka Delhi ba ngi phah da u MP ka MDA ym shuh da u MP ka NDA.

Baroh ka shong pat ha ki MLA ki ban rai iano kin phah.U paidbah u kylla long tang kum u nongpeitkai ha ka election MP Rajya Sabha namar um don bynta ei ei ha kane ka election.