“U Blei u bishar ia ka pyrthei”

AIS Suja

U Blei u bishar ia ka pyrthei (World) kaba mynshuwa; u Blei u bishar ia ka pyrthei ba mynta ruh. Wat mut ba ym don u Blei lane u Blei um iohi ne um bishar, u Blei um ju leh klet lano lano ruh. Ong ka ktien u Blei – “Ki jingbishar jong u ki ha ka pyrthei baroh, u kynmaw ia la ka jutang junom, ia kata ka ktien kaba u la hukum ha ki hajar pateng bynriew, ia ka jutang kaba u la dep iateh bad u Abraham bad ia ka jingsmai jong u ha u Isaak” Salm 105:7-9.

U Blei u kynmaw ia ka jutang bad u Abraham hyndai, ha u Israel ban long ka jutang kaba junom, u ong – “Ngan ai ka ri Kanan ka bynta ka ri kynti jong phi (kaba mut ia ki Jiw), u Blei u sumar ia ki, u la sneng ia ki Syiem ka pyrthei namar jong ki. U ong “Wat ktah ia kiba la sleh jong nga, wat pynsniew ia ki Nongiathuhlypa jong nga” Salm 105:10-5.

Ha ka por ba ki Israel ki don ha ri Egypt 430 snem, u Blei u la sumar ia ki, namar ki dei ki khun jingkular ha Egypt ki khun Israel (Jiw) ki la man bun bad roi. “Te u la pynroi shibun ki briew” Salm 5:24. Baroh kiba pyn shitom bein ia ki Israel, u Blei u la phah ia ka jingdum te ka la long dum, u Blei u la pynkylla snam ia ki um jong ki (ha Egypt) u la pyniap ia ki dohkha jong ki. Ka ri jong ki ka la boi da ki jakoid ha ki kamra ki syiem jong ki kein.

La mih ki skain bad ki jynrein ha ka ri Egypt kylleng. U la pynhap phria ha ka jaka u slap bad ka ding bameh ha Egypt. U la shoh ia ki dieng sohwain bad dieng dumbur, u la pynkhein ia ki dieng ka ri jong ki” Salm 105:28-34. Ha ka pyrthei kaba mynshuwa, u Blei u la kren, te la wan ki puid kluin bad ki puid khlam ki bym lah niew shuh, ki la bam duh ia u jhur baroh ha ka ri jong ki, bad ki la bam duh ia u soh ka khyndew jong ki” Salm 105:34-35. Ka jingialeh pyrshah ia u Blei, u Blei u la phah ki jingpynshitom halor ki Egypt bad kiwei kum ka khlam bad ki jingiapthngan.Ki Egypt ki la sheptieng shikatdei eh halor kine ki khlam ba u Blei u la phah halor ka ri Egypt. Hynrei ki Egypt ki la kmen eh haba ki Israel ki la leit noh na Egypt, naba ka jingsheptieng ka la long halor jong ki” Salm 105:38.Haduh mynta, mynta kein, u Blei u kynmaw ia la ka ktien bakhuid bad ia u Abraham u shakri jong u” Salm 105:42.
U Blei u long ujuh hynnin mynta sha bymjukut. Hynrei uba biej u ong ha la ka dohnud “Ym don u Blei” Salm 14:1. Hynrei u Blei u ong “Nga long u Blei ym don uwei pat; Nga long u Blei ym don uba kat Nga, uba tip ia kaba kut naduh ba sdang, ia kiei kiei bym pat leh naduh mynbarim” Isaiah 46:9-10.
Kumta bun ha kine ki sngi ba mynta ruh ki ong “Ym don Blei” bad kim sheptieng ia u Blei bad kim burom ia u briew. Dei halor kane kajuh ka bynta ba u Blei mynta u peit u bishar ia ka pyrthei. “U Trai u jngoh arsut na bneng ia ki khun bynriew ban khmih la don ne em mano mano ba shemphang ba wad ia u Blei” Salm 14:2.
Ym don ba wad ia u Blei. Baroh ki kam ki jingthmu ki jingpyrkhat u briew ha kane ka juk ki long kiba sniew. Dei na kata ka daw u Blei u wan mynta ban bishar ia ka pyrthei. La jia aiu? U Blei u phah mynta ki jingjia khyllah ha ri Egypt ki jingpang ki khlam (plagues) ki puid khlam kum ha Africa, America, Australia, Pakistan bad shawei, ka long ka jingiapthngan bad jingiap shyrkhei lyngba da kine kiei kiei u Blei u phah ha kita ki ri kiba ialeh pyrshah ia u.
Na kata ka daw donkam ban sheptieng ia u Blei ym ban pyrshah ia ka ktien ba u la kren namar ym lah ban pyntam ne pynduna ia ka ktien u Blei, lane ym lah ban pynkylla pyrshah ne mar khongpong ia ka ktien ba u Blei u kren. “Lada uei uei ruh un pyllang ha kine (addition the word of God), u Blei un pyllang ha uta ia ki jingiapthngan (plagues) ia kiba la thoh ha kane ka Kitab. Bad lada uno uno ruh un shim noh (take words) na ki ktien kane ka Kitab, u Blei un shim noh ia ka bynta jong u na u dieng ka jingim bad na kata ka Nongbah bakhuid” Jingpynpaw 22:18-19.
Lada kano kano ka ri ka thmu ban pynduh ia ka ktien u Blei ne pynkylla ia ka, ha kata ka ri kein u Blei un phah ia ka khlam kumba u la leh ha ki Egypt hyndai. Mynta ngi iohi ba u Blei u la phah ia ki khlam ha ki ri ka pyrthei dei namar ba ki pyrshah ia ka ktien jong u. U David u ong – “Naba men bishar ia ki kynja bynriew da ka hok, bad men synshar ia ki jaidbynriew ne ka khyndew” Salm 67:4.
Hynrei lada sheptieng burom ia u Blei, u Blei un kyrkhu. “Ka jingisynei jong u pateng la pateng bynriew ha kita kiba sheptieng ia u” And his mercy is upon Generation after Generation towards those who fear him” Loukas 1:50.