Ka Congress kam dei ban ialeh politik kum kane ka jingjia, ong u Conrad

Shillong: U Myntri Rang bah ka jylla, u Conrad K Sangma u la ong ba ka jingkynnoh ka seng Congress ba ka sorkar kam lah ban tehlakam ia ka jingjia, kam dei ban mih ha kum kane ka por namar ba ka dei ka por ban sangeh ka jingialeh politik ia ka kam iap kam im jong ki paidbah.

“Ha kum kane ka por, kam dei ban ialeh politik. Ha ka jingshisha, ngam sngew dei hi ruh ban dang kynthoh ia kane ka jingkynnoh jong ka Congress”, la ong u Conrad.

Hynnin ka sngi, ka Congress ka la kynnoh ba ka sorkar Meghalaya Democratic Alliance (MDA) kam lah ban tehlakam ia ka shongsuk shongsain ha ka jylla.

“Kane ka dei ka por ban iatreilang ban pynneh ia ka shongsuk shongsain. Kam dei ban ialeh politik”, u la bynrap.

Ula kyntu ia ki paidbah, ki kynhun bad ki dorbar shnong, ki seng sain pyrthei ban iasnohkti lang ban pynneh ia ka shongsuk shongsain ha ka jylla, ym ban wanrah kano kano ka jingpynshit ia ka ding kaba la klang.
Lah ban kdew ba ki pulit kila kem kumba 8 ngut ki briew kiba donkti ban pynmih ia ka jingpynhuri hura ha Ichamti katba ia kiwei kiba hiar thma ha ki katto katne ki jaka ha sor, dang pynlong ia ka jingtohkit.
U Myntri rangbah u la kam ba ki pulit kila dep ioh ksai ia ki briew kiba donkti ia ka jingjia ha sor Shillong bad ka ain kan leh ia kaba donkam.