Ka jingshlur kiwei ki jaitbynriew ka dei ba pynsyaid ki politishian:Ardent

Shillong: U nongialam ka kynhun Iada La Ka Ri u bah Ardent M Basaiaw moit uba long ruh u MLA u la phah ia ka khubor sngewlem sha kiba haiing jong u bah Lurshai Hynniewta uba la khlad noh haka jingshah tied ha ki briew ha Ichamati ha kane ka sngi Thohdieng.

Ha kajuh ka por, u bah Ardent u la pynrem jur ia ki jait briew kiba la nud ban hiar thma ia ki Khasi haduh ban shim ia ka jingim.

“Balei kine ki jait briew ki shlur bad ka daw ka dei na ka jingpynsyaid da ki poitishian, kiba pynbiang kot pynbiang slem por elekshon na ka bynta shimet”, la ong u bah Ardent.

U bah Ardent u la ong ba ka jingshlur kiwei ki jaitbynriew ban wan tur sha kane ka jylla khamtam na ki thain khappud, ka dei naduh ka jingwan ka Citizenship Amendment Act (CAA) 2019.
U Nongialam ka Iada La Ka Ri ula kyntu ia ki paidbah ban kyndit bynriew noh na kane ka jingjia, lym kumta ka jaitbynriew rit paid kan sa kynduh jingeh na ka jingwan hiar thma kiwei ki jaitbynriew.